A tulio Myanmar ramkomh chung COVID zawtnak cu ruah ning leng in zor lei a panh cuahmah cang tiah MoHS langhter mi COVID rai chawnhnak ningin hmuh khawh a si.
Asinain, COVID khamsii a um lo ruang ah zawtrai chawnhnak a thar a chuak than lengmang kho ding dirhmun a si ca ah zeitikdah Kawl ramkomh nih COVID khamsii a ngah telai tiah biahalnak a hung chuak ngaingai.
Cozah Ai Timhlamh ning
Myanmar ramkomh chung ah COVID khamsii ngah khawhnak ding ca ah phaisa a herh bik tiah chim khawh a si. Cu ruang ah WHO nih vawleicung COVID raldohnak ca ah ai timhtuah mi project ning in Kawl ramkomh zong umkal ai tim i ramdang le vawleipi he ai pehlai mi Bank pawl ah phaisa cawi ai tim tiah theih a si.
Myanmar COVID Khamsii Ngahnak Ding Ah $1 Billion Ai Zuam Cuahmah
Rampi cozah nih ram mipi COVID khamsii ngah khawhnak ding ca ah vawleicung phaisa phu ngan a si mi World Bank, JICA, ADB le IMF hna ca ah US phaisa $1 billion tiang cawi ding ai tim.
WHO nih an tuah mi COVAX project le Kawl Ramkomh
Rampi cozah nih hin kan hnu December 7 ahkhan WHO timhlamh mi COVAX project (vawleicung ram sifak pawl COVID khamsii ngahnak project) Global Alliance for Vaccines and Immunisation ah zangfah nawlnak ca an kuat tiah theih a si.
Hi WHO project ahhin 2021 kum dongh tiang ah Asia, Africa le Latin America sifak ram pawl ah COVID ruang ah harsat a tong fawi bik ram mipi 20% cu COVID khamsii pek khawh ding ah an timh lamh mi Project a si.
A dang 60% hi 2022-23 chung ah chunh khawh ding ah le, 40% hi WHO Project chung ah chunh khawh ding ah Kawl ramkomh ngandamnak zung MoHS nih an chim. 40% ahhin then hnih in an then i, 20% hi rampi phaisa in khamsii cawk i chunh ding ah kan ruah tiah MoHS nih an chim.
Atulio vawleicung ah COVID khamsii hi a chuak cang i, vawleicung ram ngan deuh hna ah cun an chunh cuahmah cang hna. Singapore ram hi January thla ahhin South East Asia ram ah a hmasabik COVID khamsii chunh a thawk ding ram an si.
Relchap : India Ram Ah January Thla Thawk In COVID Khamsii An Chunh Lai
