US President thimnak pi cu ni thum a kal cang nain a hodah teitu a si tiah a tutiang chimkhawh a si rih lo. Thimfung rel cuahmah lio a si ti lengmang a si.
Tukum US President thimnak cu Global Pandemic COVID-19 zawtnak ruang ah Post nih a hlankan thimfung thlak a si ruang ah thimfung rel a har khunnak a si tiah theih asi. Nihin tiang Vote relnak le teitu sinak ah bia a khiak tu Electoral Vote kong ah thil fiang taktak a chuah rih lo ruangah US President thimnak teitu thanh khawh a si rih lonak a si.
A tulio ah popular vote timi mipi thimfung in Democrats lei in zuamcawh tu Joe Biden nih President Trump cu tampi in a tei cuahmah lio a si. Asinain, Popular vote nih president tlinnak lai a rel thlu ve lo.
US thimnak ah ramdang he ai dang mi cu electoral college timi ramkulh cio ah an tthenphawt mi President thimnak camcawh fung 270 tei lawng ah teitu sinak co khawh a si.
US President ai cuh mi pakhat nih US ramkulh pakhat ah popular vote (mipi vote) in a tei ahcun cuka ramkulh i Electoral College dihlak kha ai lak khawh tinak a si (Nebraska le Maine relh loin). US ramchung ramkulh 50 ah electoral college 538 a um. Azatceo nak tam 270 tei tu nih President thimnak ah teitu si khawh a si.
A tu i kan hngah mi cu ramkulh tlawmte chung ah vote relnak ruangah a si. A tutiang ah Mr Biden nih vote 253 a hmuh cang i, Trump nih 214 a hmuh cang. An pahnih ning in President tlin khawhnak ding ca ah lam an ngei veve ko rih.
Mr Biden Pennsylvania nih a tei ahcun teitu a si colh kho lai. Asiloah cun, Georgia Nevada, Arizona le North Carolina hna hi a tei an hau. Mr Trump ca ah Pennsylvania a tei a herh. Cu leng ah Georgia, North Carolina, Nevada asiloah Arizona hna hi a tei a herh fawn. Asinain, a tu lio ah a ho nih dah teitu sinak a co lai timi cu chim awk a tha rih taktak lo.
Democrats lei nih an chimnak ah cun tuzaan (US zarhte Ni) ahhin cun US ram pumpi Presdident thimnak kong hi a fiang te ko lai tiah an chim ve.
