Nihin kan ram pumpi ahhin thimnak aa cuhmi party 90 leng an um. Cu chungah NLD hi tulio ah thimfung tambik an hmuh caah uknak a tlaitu cozah an si. 2010 thimnak ah USDP nih an kan hruai. Atuah NLD nih an kan hruai hoi. Thimnak ahcun teitu um phung a si. Amah belte Zaukphung cu mi pakhat duhnak, party pakhat duhnak lawngin kal he aa kalhmi a si.
Multi-party system timi party tampi nih thutdan icheuhbauh cio in ram hruai ahhin kannih bantuk miphun zacok khuasak nak Kawlram ahcun aa tlakbik dingmi hruaining a si.
Tu hlan vialte ramkhel an tuah le hriam an tlaih hi Newin an huat ruang, Khin Ngyunt le Than Shwe te pumpak an huat hna le ralkap an huat hna ruangah siloin mizapi duhnak siloin anmah duhnak lawngin an nawlngeihnak an hman in a uk in an kan uk caah cu an uknak phungphai cu an dohmi tu khi a si.
Cu bantuk in USDP party thlak in NLD thim hi thlennak ti khawh a si lo. Party pakhat nih hruaimi ningcang in party tampi nih hruaimi ramkhel kalning tu kha kan khel i cucu kan chuahter khawh lawngah kan ram uknak hruaining a tluang lai.
Cucu kan hawi tlangcung miphun dang nih an ifiang dih cang i Chin ramkulh dah tilo paoh ah cun anmah miphun party cio tha an pek hna. Micheu nih ralkap a nam khotu ding 2008 Phunghram a remh khotu ding cu NLD lawng an si caah anmah hi kan thim hna awk a si an ti. A dik mi a lo ngai in a dik thlu lomi bia a si.
Tlangcung miphun paoh a ho hmanh 2008 Phunghram remh a duh lomi an um lo. Kawlram pumpi milurel tuak tikah Kawl hi kan dihlak i zatuak 60% an si. Cu nih a fianter mi cu Kawlram ahcun tlangcung miphun cu kan icuh ve lo caah NLD nih teinak an hmuh rih ko lai. A cunglei i ka chimcang bang tlangcung miphun paoh nih 2008 phunghram remh cu kan duh cio mi a si bantuk in NLD nih phunghram remhnak a chuahpi tikah tlangcung miphun party paoh nih NLD cu za ah za an dirpi hrimhrim ko lai.
Cun 2008 Phunghram remhnak kong ah zapi nih kan ruah tawn lomi cu hihi a si. 2008 Phunghram cu NLD nih an remh kho lai lo. A remh khotu cu ralkap tu hi an si deuh, remh an duh le duh lo tu! Kan phunghram hi Hluttaw chung in remhkhawh lo dingin rak hren ciami a si.
NLD nih Kawlram chung dihlak i thimfung pakhath manh tang loin teinak an hmuh dih hmanh ah zatuak 75% thutdan lawng Hluttaw chungah an ngeih khawh lai caah 2008 Phunghram cu an remh kho hlei lai lo.
Asinain remhnak lam a um chun pakhat cu Kumzabu 21 Panglong Conference lawnglawng hi a s. Cucu NCA timi tlangcung hriamtlai pawl le Kawlram cozah ralkap nih kahdaihnak minsen an thutmi number 23 (d) ah khan fiang tein a ummi cu Panglong Conference ah biachahnak an tuahmi cu a herhmi phungphai le phunglam pawl (Phunghram pi tel in) remhnak ding caah a hrampi siseh tiah kan lung a tling timi catlang a um. Cucaah Kumzabu 21 Panglong Conference ah kan Phunghram pi remhnak kan nawr khawh ding lawng hi ruahchannak a um chun a si timi cu DASSK zong nih aa fiangtuk.
Cu ah a biapi than mi pakhat cu rampi thimnak i teinak a hmumi Party lawng hi Conference ah itel khawh ding timi mumai a um. Cu tikah 2015 thimnak ah Chin Party nih thutdan pakhat hmanh an hmuh lo tikah kan miphun aiawh in Panglong Conference a kai tu ding an rak um lo. CNF lawnglawng kha hriamtlai dirhmun in an itel.
Tutan ah kan miphun nih kan party kan dirpi a si ahcun kan duh bik mi Phunghram pi hremhkhawhnak um chun lam a simi Panglong Conference ah itel in kan miphun nih kan duhmi, kan herhmi chimrel le phunghram remh nak caah thazaang chuah in dirkamh khawh ve nak lam an ngei lai. CNF lawngnih a nam tawnmi vaampang pi kha Miphun party nih a vun bawmh ve ahcun pakhat nak in pahnih hrat cu an thazaang aa hlum lai i hmual an ngei deuh suaumau ko lai.
Kei nih cun Zo Zam, No Than Ka pee David Ngai Sak ee ho ee timi nak in Chin party cu Chin miphun kan dihlak party a si i kanmah aiawh in kan caah a dir ding a si timi lungput he kan miphun caah kan miphun party thim hi a biapibik a si tiah ka ruah.
(Theihternak: Hi Capar hi Salai Ngun San Aung nih CML Journal Vol.2 ah a ttial mi, CBN nih kan rak thlah chin mi a si. CBN dirhmun a si lo_Editor)
