Zei ruang ah dah Mr.Shinzo Abe hi Yamagami a thah
Prime minister hlun a si mi Shinzo Abe cu zei ruang ah dah a thah ti mi Tetsuya Yamagami nih a chim.Yamagami a nu nih biaknak phu pakhat cu a zumh tuk i a ngeih mi vial te a pek dih ruang ah tangka lei an chan bau cang caah Yamagami cu a thin a hung.
Cu biaknak phu cu Mr.Shinzo Abe nih mi nih theih chin ding in a tuah caah Yamagami thin hunnak cu Shinzo Abe cung ah a tla tiah, Yamagami nih a chim.A hlan deuh ah cun bom in doh a tim nain a hnu ah a timh mi a tlan i kut ser meithel in a kah.
Yamagami a nu nih tangka tam pi a pek nak biaknak phu hi cu Japan Media pawl nih an langhter lo.
Yamagami hi 2002 in 2005 tiang Japan tilawng ralkap a rak si bel tiah Japan media nih an langhter.Yamagami hi riankawl paiknak company ah CV form a rak pek bel i 2020 hnu ah cun Tokyo i thilsernak ah forkitt mawngtu ah a rak tuan.
A nih hi kum 1 chung ah palhnak a tuah mi pakhat hmanh um lo nain a luan cia April thla lai hrawng ah khonh hal lo in a um hnu ah rian ngeitu sin ah rian chuahnak ding a rak hal.A khonh lak mi a tan rih caah khonh in a um i May 15 ah khan a khonh dih i rian a rak chuak.
Yamagami hi dot 8 nak innkhan fa te chung ah a um i a tangbik dot ah cun bar dawr a um.Yamagami hi pawngkam minung he zong bia an i ruah tawn lo.
”Shinzo Abe a thah hlan 3 a duh lio ah Yamagami cu ka hmuh i ka chawnh nain a ka chawn than lo” tiah a inn tang um mi nu nih a chim.
“Yamagami he voi tampi kan i tong bel nain elevator chung ah ka chawnh zong ah a ka let lo” tiah dot 6 nak ah a um Vietnam nu pakhat nih chim.
Yamagami hi online in a cawk mi a cheuchum pawl hmang in thir pipe cu tape in a fun i kut ser meithel a tuah hi a si.Yamagami nih a hman mi meithel hi tuah a fawi tuk mi a si tiah mah lei theitu nih a chim.
Yamagami nih Shinzo Abe hi thah ding in kum saupi timh lamhnak a ngei cang i mah a can hlan nikhat a duh ah khan Nara peng he 200 kilometer a hlatnak ah Shinzo Abe nih bia a chimnak pakhat zong ah a rak kal.(Crd.Yoyarlay)
