South Korea le North Korea karlak ah elhniarnak tete a um pah caah ralkap thar mino 1.4 million an khawmh suat kong North Korea cozah nih tlaih mi media hna nih nizan October 16 ah khan an thanh.
South Korea nih hin Drone hmangin North Korea ralchanh nak caa hna cu kan hnu lei zarh ah khan North Korea khualipi Pyongyang ah an thlak tiah North Korea lei nih cun an chim i cu thil an tuah ruangah an mah ram pahnih pehtlaihnak hlei pakhat zong North Korea nih bomb in an puah leng ah hi thil kong ah tuanvo an laak hrim hrim lai tiah an tlerhkhawnh hna.
A tu bantuk in ralkap thar an khawmh suat mi hna chungah hin siangngakchia hna le mino pawl an i tel hna i kan ral hrawh ding ah a thianghlim mi ral a tu dingin biakhiahnak a tuah mi an si hna tiah North Korea media a si mi KCNA nih a taar.
“Ral a thawh cun South Korea cu an vulei (Map) in an tlau lai. Raltuk an duh taktak ko a si cun an sinak vialte kan hloh viar hna lai. Timhcia kan si cang.” tiah KNCA nih cun a langhter.
South Korea he ral lei elhniar nak ruangah ralkap thar kan khawmhsuat hna tiah North Korea nih hin kha hlan zong ah a rak thanh bal cang nain a tak in fehter khawh a si lo.
Kan hnu kum zongah khan North Korea cozah tlaih mi media nih American tuknak ding ah ralkap thar lut dingin min cazin aa pe mi minung ting 8 an si tiah a thanh bal. cu pin ah 2017 lio zong ah khan rampi rian ttuan dingin le ralkap a tla ding ah micazin a pe mi minung 3.5 million an um tiah a rak thanh fawn.
IISS nih a langhter ningah North Korea nih cun ralkap 1.28 million tluk a ngeih i reserve caah ting 6 tluk a ngeih leng ah ram rian ttuan tu 5.7 milllion a ngeih tiah a langhter.
