2020 thimnak phichuak ning in Hluttaw meeting tuah ding ni tawi te lawng ai duh cang mi ah NLD cozah, UEC, Tatmadaw le USDP hna karlak ah bia alnak fak ngai a chuak. Tatmadaw lei nih uknak lak khawh a si ti mi bia a chuah rualrual in Yangon khuachung ah ralkap mawtaw hring pipi lampi cung ah hmuh khawh a si.
Ralkap nih an mah duh in an tuah mi 2008 phunghram pi cu hrawh khawh a si ti mi le ralkap nih uknak lak lo ding chim khawh a si lo timi bia hna hnu ah tutan mawtaw hring pawl hun hmuh hi a si.
Yangon khua Bahan peng U Thawng Bo Junction pawng hrawng ah nizaan chunlai ah Tatmadaw ralkap mawtaw hring pipi cu an chawh pi. Kachin ramkulh Bamaw khua zong ah Ralkap mawtaw hring lamcung ah an chuak tiah Facebook cung ah a chuak. Sagaing ramthen Kanbalu khua zong ah January 27 ahkhan ralkap mawtaw ai chawk ti a si.
A tulio Myanmar ramkomh chung ah ralkap bu Tatmadaw nih thazaang hmuhsaknak le mipi thinphang in tuah hram a thawk tiah micheu nih cun an chim. 2020 thimnak ah thimfung firnak a chuak tiah USDP party le Tatmadaw nih voitam ngai te an chuahpi. Asinain, nihin tiah tehte taktak he an chuah pi kho lo. UEC tu nih cun kaphnih hmai ah a herh ahcun thimfung kan zoh than khawh tiah thanhca an chuah ve.
Source: 7Day News
