Wisconsin State Ah Christmas Puai Tuahmi Mawtaw In An Pah Hna Caah Minung 5 An Thi, 40 Leng Hliam An Tuar
American ram, Wisconsin state Waukesha khuapi ah kan hnu sunday ni ah Christmas lawmhnak puai tuah in lampi cungah ai chokmi mibu hna cu mawtaw in an pah hramhram hna caah minung 5 an nunnak liam i 40 leng hliam an tuar tiah Palek nih an chim.
Tubak tuk in mawtaw in an pahmi hna kong ah terrorist an si le silo cu hngalh a si rihlo, mawtaw pah hnu in a dang thil zeihmanh a chuak chap tilo tiah palek bawi Dan Thompson nih a chim.
Mibu a pahtu hna hi SUV mawtaw si i suimilam pakhat ah 60km tluk hrawng rang in a mawngh lai tiah zumh asi tiah mithmutu pakhat nih media hna sin ah a chim.
Kum 9- 15 hrawng nu ngakchia a laammi bu pawl a rak pah hna hi asi i mawtaw khaaltu cu kan tlaih tiah palek nih an thanh.
White House nawlngeitu pakhat nih hikong hi President Joe Bidden sin ah kan chim cang i a herhmi bawmhchanhnak zong kan pek colh hna lai tiah a chim.
#VOA
