CBN News, 15 Jan 2021 : Vawleicung nih a buaipi cuahmah mi, Covid-19 a rak thawk ning le minung ah i chonhbarh a fawining hlathlai tuding World Health Organization (WHO) expert team hna cu Nizan date 14 Jan 2021 zingka ah Covid-19 aa thawknak Wuhan khawpi an phan.
WHO le China cozah hna hi China ram ah expert team thlah kongkau ah voi tampi i chonhbiaknak an rak ngei cang, China cozah nih an ramchung ah luh a sianh hnu ah team member hna cu an rak kham tthan hna, a sinain a hnu ah sianh tthan an si.
Expert team ah hin ram dangdang Sceintist minung 15 an um, an team member minung 2 hna cu Covid-19 positive an si ruangah an kal velo i midang minung 13 hna nih Wuhan khawpi an panh hi a si.
Expert team hna nih hin Wuhan research institute, Sizung le Covid-19 rai an hmuhnak Seafood Market hna ah hlathlainak an ngei lai. Covid-19 hi Kum 2019 kum donghlei ah Wuhan ah hmuh a si, a sinain China cozah nih Wuhan cu Covid-19 chuahkehnak a silo kho tiah an chim ve.
Expert team hna hi an rian hma an domh hlan ah zarh 2 chung Quarantine erh hmasat an silai, a sinain Quarantine an um chung ah hin Video Conference hmang in China mithiamsang pawl he i chonhbiaknak an ngei lai. Expert team hna hruaitu cu Scientist Peter Ben Embarak a si.
CBN News
