Kachin ramkulh,Waingmaw peng SAC ralhraang thazang 200 tluk nih hmun an khuarnak Kazu sakhaan le Kha-Shi khuate um SAC ralhraang sakhaan hna tiin sakhaan 4 cu KIA nih nizan May 19 zaan ah khan tlamtling tein an laak tiah theih a si.
Waingmaw peng Myitkyina-Bamaw lampi cung a um mi Kazu SAC sakhaanpi cu KIA nih May 18 khan kah hram an thok i nizan May 19 zaan slm 8:00 tluk ah tlamtling tein an laak.cu sakhaan ah cun ralhraang thazaang 200 tluk an um i SAC lei in a thi le hliam an tam ngai ngai tiah theih a si. cu leng ah Waingmaw khua luhnak pawng a um mi Khashi khuate ralhraang sakhaan pawl zong nizan zaan slm 11 tluk ah an laak khawh hna hi a si.
“Kazu sakhaan ah hin ralhraang 200 tluk an um.a thi mi an tam ngai.an sakhaan hi a lian mi chung ah aa tel.cun Waingmaw luhnak pawng a um mi Khashi sakhaan zong kan laak hna. Kahdohnak hi Waingmaw khuapi a naih cang” tiah KIA thawnghram pakhat nih Khit Thit Media ah a chim.
May 19 thiam thiam ah SAC nih tlangcung ah an chiah mi sakhaan pahnih, Byinpo sakhaan le Lai-phawng sakhaan hna zong KIA nih an laak caah May 19 lawng i an laak mi sakhaan hi 4 a si. Shwe Ngaung Pin khua hrambunh SAC LIB 321 sakhaan zong KIA hruaimi ralkap hna nih an nam cuahmah lio tiah theih a si.
“Nihin zinglei thok in Shwe Ngaung Pin ah kahdohnak fak taktak in a chuak cuahmah.SAC lei nih Hriampi le vanlei kahdohnak tamlak te a hman cang” tiah KIA thawnghram pakhat nih Khit Thit Media ah a chim ve.
March 7 ah aa thok mi KIA nih kalpi mi Operations chung ah SAC sakhaan 100 leng an laak cang tiah theih a si.
