Rel hmasa khawh ding: COVID Khamsii Ngahnak Ding Ah Zeitluk Dah Aa Duh Cang?
US ram sii chuah tu Company a si mi Pfizer le BioNTech hna nih an tuah cuahmah mi COVID-19 rai khamsii Pfizer cu Coronavirus khamhnak ding ca ah 90% tiang a kham khawh tiah an chim. Hi ruang ah COVID-19 rai doh nak ding ca ah vawleipi ca ah ruahchannak sang ngai a si tiah an zumh cio.
Hi Pfizer khamsii kong hi November thla 9 ahkhan a konglam thanhnak an tuah hi a si. Asinian, sii lei thiamsang hna nih vawleicung ramkip a phak tikah hi sii nih rian a tuan khawh dih lonak kong ah biahalnak tampi a um kho. Cu ca ah kan hlawh a tling bak tiah chim rih ding a si lo tiin ralrin an pak ve hna.
Pfizer nih thawngthanhnak a tuah in vawleicung ram hruaitu hna nih conglawmhnak bia an chim cio. Stock man zong a kai ngaingai tiah hmuh khawh a si.
Nihin vawleicung ah COVID-19 zawt rai ruang ah minung 1.25 million milu an thi cang i, hi zawtnak khamnak ding ca ah tiah vawleicung phu 100 leng nih COVID-19 khamsii chuah ding ah an i zuam cuahmah. Cu chung ah hlawh a tling mi hi phu 4/5 taktak lawng hngalh khawh an si rih.
Pfizer Nih Zeidah A Thanh?
Pfizer le BioNTech nih an tuah mi COVID-19 khamsii hi vawleicung ram 6 ah minung 44000 hrawng hneksaknak an tuah cang ti a si. Hi zat minung chung ah zatceo hi a sii taktak chunh an si i, a cheu cu pum ca ah harnak a pe kho lomi sii deu chunnh in hneksak an si tiah Pfizer nih an chim.
Asinain hi khamsii nih zeitluk sau dah zawtnak a kham lai, tar upa hna sin ah zawtnak a kham kho lai maw timi le a dangdang hneksaknak tete cu tampi a tang ve rih tiah an chim.
Hi Khamsii Hi Pumchung ah Zeitindah Rian A Tuan Lai?
Na takpum ah khamsii an in chunh tikah a tlangpi in a thi cia mi virus pumcheu asiloah a tha a der mi virus phun kha na tak ah an in chunh lai. Virus der mi, virus thi cia pumcheu le bacteria an in chunh ko nain na zaw lailo. Na taksa nih a leng lei in a ra mi thil a um kha a hngalh lai i, tei aa tim lai. A cungah langhter mi Virus timi hi a taktak virus siloin Coronavirus pumchung riantuannak cell cheu tete kha chim duh mi a si.
Cucu mRNA tiah an kawh. Hi bantuk virus pumcheu cell tete takchung a um cang tikah protein tampi an chuah i virus taktak kha fawi tein an doh khawh lai ti a si.
Zeitikah Dah Zapi Hman Khawh Asi Lai?
Pfizer khamsii hi a hnubik an hneksak mi minung pawl zohchunnak an tuah cuahmah lio a si i, thlahnih a tling deng cang. A ralaimi Devember thla ahhin cun FDA zong nih Emergency in khamsii hi chuahnak nawl a pek lai tiah zumh a si. Cu ca ah a tuanbik December thla ah cun vawleicung phunglut in COVID-19 khamsii hmuh khawh a si lai tiah zumh a si.
Caan a rauh tuk lo nakhnga ca ah tiah Company pawl nih Pfizer khamsii hi a tthat taktak le taktak lo ai fiang rih lo nain emergency ca ah nuai 50 tiang chuah ding in an i zuam cuahmah cang ti a si. 2021 kum ah cun 1.3 billion tiang chuah khawh ding ah ruahchan a si.
US ram Company Pfizer & BioNTech chuah mi Pfizer khamsii cu US cozah nih hmasa bik ah nuai 100 cawk ding in min a thut cang. A phaisa man in 1.95 billion dollar man a cawk colh lai. Pfizer nih hin Europe, England, Canada le Japan tibantuk ram pawl he i cawkzuarh ding zong ai tim tiah theih a si.
Source: Pfizer
