Vawleicung ah i chawnhbarh cuahmah mi COVID-19 zawtrai cu vawleicung khamsii chuahtu hna nih an i zuam lengmang hnu ah an chuah pi mi COVID khamsii cheukhat an hlawh a tlin hnu in vawleicung ram cheukhat nih rianrang tein khamsii chunh hram an i thawk cio ve.
Nihin tiang vawleicung cung ah COVID khamsii chunh hram a thawk cang mi ram hna cu khuazei ram dah an si, kan rel hna lai.
UK
UK ram hi vawleicung ah COVID khamsii Pfizer cu phunglut in a cohlang hmasabik ram an si i, December 8 thawk khan Pfizer-VioNTech nih an chuah mi Pfizer khamsii cu kum 90 pitar an chunh thawk in ramchung ah khamsii chunh hram an thawk ti khawh a si.l
A tulio ah UK ram ah COVID zawtnak phunthar a chuah ruang ah minung tampi zawtnak an i chawnhbarh i, UK ram khuapi cheukhat cu Christmas le Kumthar Lockdown an chiah.
UAE
Middle East lei in UAE ram khualipi Abhudabi chung ah December 14 thawk khan Pfizer khamsii chunh hram an thawk ve. An nih UAE ram hi Pfizer lawng siloin, Tuluk chuak khamsii Sinopharm zong rampi level in an chunh lai tiah theih asi.
US
US ram hi vawleicung ah COVID zawtrai a karh bik nak le mithi zong an tambik nak ram a si ko rih. An nih ram zong hi December 14 thawk khan ramchung ah COVID khamsii an chuah mi Pfizer lawng siloin Moderna zong an cohlan an chunh cuahmah lio hna a si.
Canada
Canada ram ahhin Pfizer COVID khamsii cu December 14 ahkhan kum 89 tarnu pakhat an chunh hnu in ramchung ah COVID khamsii chunh an thawk. December 24 zong ahkhan Mordena zong an cohlan i Khamsii an chunh cuahmah lio a si ve.
Saudi Arabia
Arabian tikulh ahhin COVID zawtnak ai chawnh mi 360,000 lengkai an um i, minung 6000 leng an thi cang i a si. An nih ram zong ah COVID-19 khamsii Pfizer cu December 17 thawk khan chunh hram an thawk ve.
Israel
Israel ram hi ram pumpi in COVID khamsii i chun kho ding in an tuak ti a si i, December 19 thawk khan kum 71 a si mi an ram Prime Minister Nethanyahu nih COVID khamsii ai chunhnak cu rampi TV in an thlah.
Qatar
Qatar ram ahhin mikip nih a lak in COVID khamsii an i chunh khawhnak ding ca ah tiah December 22 ahkhan a voikhatnak Pfizer khamsii a phan i an chunh hna. Qatar ram hi Pfizer leng ah Moderna le Oxford University chuah mi AstraZeneca khamsii he zong lungtlinnak min an thut.
Mexico
Vawleicung ah COVID rai in mithi tambik hram ah ai tel ve mi Mexico ram zong December 24 thawk in chunh hran an thawk ve. A voikhatnak ah minung 3000 an chunh hna ti a si.
Chile
Latin America ram ah COVID khamsii a chun hmasabik ram ah Mexico dih in Chile ram hi a si ve. December 24 thawk khan an ram President Sebastian Pinera an chunh in rampi ah chunh hram an thawk tiah theih asi.
Russia
September thla chung ahkhan Russia nih an mah tein an i chuah mi Sputnik V timi COVID khamsii cu an rak chunh cang tiah theih a si. August 13 ahkhan President Putin nih Russia cu vawleicung ah COVID khamsii a cohlang hmasabik ram kan si tiah TV thawng a thanh.
Source: Aljazeera
