October 2 lio ahkhan Qatar ram Doha vanlawngbual hnawmbawm ah hngakchia chuakka te cu hnawmbawm chung ah char a si. Hi kong he pehtlai in a hodah a hringtu tiah an kawlnak ah Qatar rampi a mual a pho.
Doha Airport in a zuang ding ai thawh mi vanlawng pakhat ai cit ding mi nu hna cu hi hngakchia chuakka hringtu an si le si lo cheknak ah zohchia khenhru in an chek hna ruang ah Qatar ram cu fak piin an soisel cang.
Doha khuapi Hamad Airport ah hi thil a cang hi a si i, bawhkeuh chuakka pakhat hnawm bawm ah an char khawh bak in vanlawng ai thawh ding nu paohpaoh fak ngaingai in chek an tong. A rauh hlan caan tlawm pal ah nau a ngei mi an si maw si lo ti mi cheknak an tuah ruangah nu tampi an pumpak kong ah fak piin hnursuan an tong tiah an soisel hi a si.
Vanlawng pakhat cung ah cun Qatar ram mi nu 13 le ramdang mi minung 5 hna cu an auh than hna tiah Australia cozah nih a thanh.
Qatar ram lei nih hi thil kong ah fak piin zaangfah nawlnak an tuah than hna. Cu pin ah hlonh a tong mi hngakchia te zong dam tein a um ko tiah an chim. Cu pin ah hi hngakchia hlonh kong hi fak piin hlathlainak kan tuah than lai tiah an thanh.
Nausen chuakka te cu plastic bawm in tuam hnu ah hnawmbawm ah chiah a rak si. “Hibantuk sual chimpit thil hi an luat sual lai ti phan nak ah nu hna i an pumpak humhimnak tiang le an zalonak hnahnawh an si mi kong ah Qatar cozah lei nih kan lung a ttha lo tuk” tiah an chim.
Hi mawhchiatnak kong ahhin Australia cozah nih hawi hmai bik ah thawng a thanh. Nu hna an thilphoih ding in chek an tonnak kong ah Australia khualtlawng mipi nih Australia cozah sin ah report an tuah. Cu tikah Australia cozah nih mawchiatnak fak piin a thanh. Australia cozah ah ralchanh party nih cun Doha ah hi thil an tonmi hi “chiattha serhsatnak” a si tiah fak piin an aupi ve.
Source: BBC
