US President nih a chuahpi mi Amy Coney Barret cu US ram biacaihnak sang bik Supreme Court ah Biacaih bawi ah an hun fehter khawh cang ca ah US ram thimnak zarhkhat ai duh ah hibantuk a hung um mi hi President Trump ca ah teinak pakhat ah a cang.
Democratic party lei dohdalhnak tampi lak ah President Trump phu a si mi republican party palai pawl hna nih thimfung relning 52/48 in an tei i fehter a si.
Amy Coney Barret Supreme Court ah thim a si ca ah US ram biacaihnak hmun ah a tam-u hmun 6 ah Republicans nih an control khawh cang lai i, Democrats nih hmun thum lawng an ngei cang lai tinak a si.
Biacaih Bawi Amy Coney Barret a nunchung paohpaoh hi hmunhma hi ai tlaih khawh mi a si ca ah ramkhel he pehtlai in siseh, Democratic lei nih an duh lomi thil biacaihzung a phak tikah Democratics lei duh loning in a kal lai ding mi hi Democrats pawl nih an phan ngaingai mi a si.
Kum 48 a si cang mi biacaih bawi Amy Coney Barret hi President Trump he White House ah biakamnak an tuah tti cang. A mah hi President Trump nih Supreme Court ah biacaih bawi ai thim mi a pathumnak a si. Amy Coney Barret hi US Supreme Court ah a kum a no bik biacaih bawi a si lai.
White House Ah Zeidah An Tuah?
Pensylvania ramkulh ah mipi thimfung thlak sawmnak a tuah hnu ah a rak tlung mi President Trump cu White House a phak ah Biacaih bawi thar Amy Coney Barret cu White House ah biakamnak a tuah pi colh.
“Nihin hi US ram ca ah siseh, US ram phunghrampi ca ah siseh, US phunghram pi ca ah siseh, a dikfel hi ttanh hlei ngei lo zulhphung kong ah tuanbia kan ser ni a si” tiah President Trump nih a chim.
Amy Coney Barret cu mizei dah a si?
- Nauhrawh nak kong le ngeikhat tthit umnak kong he pehtlai in a tuanbia rak zoh tikah conservative ngai mi minung a si.
- US phunghram pi remh tthen a duh lo tu.
- Law cawnnak ah professor zong caan saupi a rak ttuan cang mi a si pin ah Federal court zong ah kum thim a rak ttuan cang mi a si.
- Biaknak lei ah ai pechan ngai mi RC member a si i, Haiti ram in ai cawm mi hngakchia pahnih he fa pasarih a ngei mi a si.
- Indiana ramkulh um a si.
Source: BBC
