CBN News, 09 Nov 2020 : November 3 i US president thar thimnak ngeihnak ah result kim in thanh a si rih lo nain, Democratic party presidential candidate Joe Biden nih President ah tling dingi vote hmuh a herhmi zat a hmuh i US president 46 nak siding in thim a si.
Joe Biden nih mipi vote million 74 leng a hmuh cang, US president thimnak ngeih cangmi vialte lak ah vote hmu tambik a si rih. African-American vote a hmuhmi a tam, hi ruangah African-American hna cungah lawmhnak bia a chim.
President caah Biden nih tainak a hmuh theih a sile cangka khuapi dangdang ah amah ttanhtu hna nih lawmhnak an tuah, Trump ttanhtu hna zong hmun cheukhat ah a bu in an chuak hna nain buaibannak a chuak lo.
Biden le a Vice President candidate Kamala Harris hna nih teinak an hmuh le cangka Wilmington, Delaware ah an mah ttanhtu hna hmai ah lawmhnak biachimnak an ngei, pumkhat sinak sersiam dingin aa tinhnak Biden nih a chim i Red le Blue state umlo in United state a si tiah a chim.
America mipi caah a si khawhchung rian ttuan aa timhnak a chim i America ram ropuinak lungphum middle class tthawnter le vawleicung nih America a ttihzah khawhnak hnga i pumkhatnak ser aa timhnak a chim, hi aa tinhmi hi mipi nih an duhmi a si ruangah an vote nak zong a si.
Baibal thiangah zeizong vialte caah caan ruat a si tiah kan hmuh bangin America caa zong ah ram le miphun damnak caan a phan cang tiah Biden nih a chim i, vote a ka petu le vote a ka pelo tu hna caah thleidannak umlo in rian ka ttuanlai tiah a chim.
President thar donnak
US president thar dingah thimmi Joe Biden hi nakkum 2021 January 20 ah President ah cohlan a silai.
President thar cohlannak pumhnak cu Washington DC, Capitol Building ah ngeih a silai i Chief Justice nih biakamnak a ngeihter lai. US President thar hna nih biakamnak an ngeih hnu ah Pathian sin ah bawmh an halnak ‘So Help me God’ timi hi official biakamternak ah telhchih a silo nain President thar thimmi paoh nih chim peng a si. hi bia hi Abraham Lincoln nih chim hram a rak thawkmi a si.
Joe Biden
US president 46 nakding i thimmi Joseph Robinette Biden Jr hi kum 2009-2017 chung ah khan Vice president 47 nak a si, 1972-2009 ah khan Delware ah Senator a rak si.
Kum 1942 November 20 ah a chuakkekmi Biden hi Scranton, Pennyslvania le New Castle County, Delaware ah a tthanglian i, Syracuse University in Law degree buaih a lak, Kum 1970 ah New Castle County Councillor a si i, kum 1972 ah Delware in US senator ah thim a rak si i US tuanbia ah senator hngakchia bik pa 6 nak a si.
Kum 2009 – 2017 chung ah Vice president a si i kum 2019 ah khan Obama nih Presidential Medal of Freedom laksawng a rak pek.
Joe Biden hi Vice president vialte hna lak ah President silio mi tai khotu Vice President 2 nak a si, kum 1968 ah khan vice president Richard Nixon nih President a rak tai cang.
Joe Biden nih hin a nupi hmaisa, kum 1972 i a thi cangmi Neilia Hunter he fa 3 an ngei i kum 1977 ah a tu a nupi Jill Tracy Jacobs he an i um i fanu pakhat an ngei.
CBN News
