US President Trump a duh tu mipi hna nih vawleicung minthang le Democracy ralhruang tiah theih a si mi US Capitol Hall cu ralhrang muisam keng in an luh hnawh i, a tlawmbik minung 4 an nunnak a liam tiah theih a si.
Nithum Ni zaanlei suimilam 2:30 pm hrawng ah Trump a duhtu mipi hna nih Capitol Hall an kulh i an buaihnawh hna. Cu ca ah Hluttaw meeting zong an dinhter i, Senators le Congress upa hna cu himnak hmun ah an chiah hna. Vice President Mike Pence zong himnak vawlei kua chung ah an thuh tiah theih a si.
Vice President Mike Pence nih US tuanbia ah khuaci kan muih ni pakhat a si tiah a chim. Ralhrang tuahsernak nih zeitik hmanh ah teinak a hmu bal lo tiah, zalennak lawnglawng in hlawhtlinnak kan hmuh lai tiah a chimchap.
US Capitol Hall cu zaanlei suimilam 5:40 pm lawng ah a congtu le security chah taktak in an control khawh than. Congress security upa nih Washington khuapi cu zaanlei suimilam 6 in zinglei suimilam 6:00 am tiang curfew kan tuah tiah nawlpeknak an thanh.
Cu leng ah himnak lei in tuanvo la tu ralkap 1100 zong an thlah cang hna ti a si.
Hi buainak ai thawk hi zaanlei suimilam 2:15 pm hrawng khan a si i, November thla ah thimnak result le teitu thanhnak a tuahtu Vice President Mike Pence nih mipi buainak ruang ah meeting a ngolter.
Meeting an ngol hnu ah mipi hna cu Capitol Hall chung ah hramhram in an lut i, Vice President thutdan tiang an buai. Cu leng ah ai fimhlawm manh lo mi Congress upa hna nih thutdan cabuai khiak in pumvennak ca ah mipi he an i dir onh.
President Donald Trump cu Twitter nih hmakhat te ah catial an kham colh.
President Donland Trump hi a tu US buainak ahhin tuanvo ngei tu a si tiah sual an phawt i, cu hlan ah a mah a tanhtu hna lila zong nih sual an phawt cang.
President Donald Trump nih hin mipi hi US White House in a forh hna. Asinain buaibainak zoh a chiat tuk cang tikah President Donald Trump nih “inn ah lawi cang u, kan in dawt tuk hna” tiah ca a tial.
A tubantuk buainak hi US ram le Africa ram bantuk lawng ah a cang mi a si i, President hlun W. Bush zong nih hibantuk hi US ram ah tuah a ngah lo tiah fak ngai in a doh hna. President Trump a tanh ngai tu US White House secretary Alisha Farra zong nih Twitter cung in ‘thimnak hi fir a si lo, kan tlau bia an si ee” tiah a tar cang.
Buainak hnu ah thil a hung cang mi cu Washington khuapi ah mibu hna le chawlehnak lei minthang phu hna, upadi thiamsang hna nih Vice President Mike Pence nih hin US constituition dal 25 nak bantuk in President hi hmakhat te ah President sinak in thlak colh ding a si tiah an hal cuahmah cang.
US rampi thimnak ah a hnubik thimnak a cang mi Georgia thimnak ah cun thutnak pahnih ning te in Democratic Party nih teinak an hmuh. Congress ah siseh, Senate ah siseh, Democrats nih an control khawh cang tinak a si.
Hluttaw pahnih ning te in party pakhat nih tei ti mi hi US tuanbia ah 1892 lawnglawng ahkhan a rak cang bal mi a si. Cu ruang ah Democratic pawl nih hin Trump cung ah an i lawm lehlam lai tiah thiamsang hna nih cun an chim.
President Donald Trump nih president a tlin khawhnak ding ca ah Senate hruaitu a si mi Vice President Mike Pence nih a kham khawh lai tiah a chim nain, Mike Pence nih US phunghram pi ka zulh lai tiah a chim khawh in tutan Capitol Hall buainak hi Trump nih a forh hna a si tiah zumh a si.
Cu ca ah US President pakhat nih mipi forh in buainak an ser mi hi Democracy ram hmai a chiatter i, US tuanbia ah thil dawhcah lo taktak a si nak a hung si. US tuanbia ah Democracy ralhruang ai hninh ni zong a si. Republicans lei in President zong a rak i cuh bal mi Mitt Romney nih cun, “hibantuk minung (Trump) thimfung nan rak pek ruang ah hi thil a can a si ko hih. Zoh uh” tiah a chim.
Vawleicung Democracy pabik ti mi US cu president Trump hruainak le mipi forh khawhnak nih a khuachiat cang. US ram Democracy ralhruang ai hnin ruangmang ko.
Source: The New York Times
