CBN News, 06 Oct 2020 : Covid-19 zawtnak ngeih ruangah Ralkap sizung, Walter Reed Medical Centre i thlawpbul lio mi US President Donald J Trump cu zarhpini ah khan Sizung lengah motor in aa chawkvak i lenglei ah amah tanhtu le dirpitu a zoh hna, a sinain President Trump nih sawisel aa huah colh.
President Trump hi kan hnung zarh cawn ningani thawk khan Covid-19 possitive ruangah sizungah thlawpbul a si, a ngandamnak dirhmun hi fiangfai in chim phuan a si loh, White House nih mild symptoms a ngei tiah an chim i a sinain Sizungi zohkhenh a si hnu ah a oxygen level a niam deuh ruangah a hlei in extra oxygen pek a si.
Hi pin ah President Trump hi mizaw zualhma thlawpbulnak i hman mi Steroid Dexamethason zong pek a si tiah expert hna nih an chim.
Zarhpini i Sizung leng a chuah lio ah hin Mask i vuah hmanh selaw Motor chung ah a um vemi midang Secret Service staff hna caah a him loh tiah chimcaih a si, hi pin ah ngandamnak lei (Health) nawlngeitu hna nih quarantine dingi ruahnak an cheuhmi a buar tiah chimcaih a si.
Hi lio ah White House medical team hna nih cun lengchuah a him ko tiah onh hnu ah lengchuahter mi a si tiah an chim ve.
CBN News
