46nk US President a hung si mi Mr Joe Biden cu President sinak caah Chiatserh biakamnak a tuah dih khawh suimilam caan chung ah President hlun Donald Trump i a policy hlun pawl cu hrawh ding ah ai tim i, nawl a chuah cuahmah cang.
President hlun Trump le COVID-19 zawtnak policy, pawngkam le US ram ah khual luhchuahnak kong hna cu a hrawh hna i; US chawlehnak a lu a hun tun than naklai ramchung ah i remnak le lungrualnak a chuah khawh nakhnga hna kai zuam lai tiah a nolh lengmang.
President thar a hun si bak in President nawlchuahnak, theihpinak ca le thanhca tibantuk cathanh 17 bak te a chuah colh i, US ram president thutnak compeiti muisam cabuai cung in min a thut colh ti a si.
Hi cathanh pawl ahhin President Joe Biden nih Paris Climate Change Agreement ah US i tel thannak, Muslim ram le Africa ram cheukhat hna cu US ram luh khawh thannak nawl hna cu President hlun Trump chan ah rak khar a si nain, President thar nih rianrang tein a hrawh colh.
“Biapi ngai le biatak ngai in rian kan tuan lai. Hi khuasik lak ahhin harnak zong a tam lai, hlawhtlinnak ngan ngai zong kan chuahpi ding an tampi ko” tiah President thar Biden nih a chim.
“Remh ding zong a tampi, kan sungh cia mi sersiam than ding zong veizat, dam lak in thlop ding hma le rung zong chim cawk lo, sersiam than ding, hlawhtlinnak ca ah tuah ding mi rian tam taktak kan ngei” tiah Biakamnak a tuah ni ah a chim.
Nihin ah President Biden nih min a thut mi cathanh cheukhat chung ah US ram pumpi mask i hruk dih ding order siseh, Trump chan ah vawleicung ngandamnak phu WHO in US an chuah mi luhpi thannak cathanh ti bantuk an i tel.
Source: NY Times
