US mipi nih avoi 46nk an President ca ah Joseph Robinette Biden Jr. cu an thim cang. Kum 72 putar pa, US ram ca ah kumhra bu zeimawzat rian a ttuan i, 2008-16 tiang President Barrack Obama Vice-president a rak tuan mi pa cu tlinter a si cang. Asi ah Joe Biden cu a ho set dah a si kun?
Joe Biden hi November 20, 1942 ah Pennsylvania nichuah thlanglei Scranton khua ah a rak chuak. Apa Joseph Biden Sr. mawtaw zuarnak le thirlin sehzung hnawmthiant tu a rak ttuanmi a si. A nu hi Catherine Eugenia a si.
US ramkhel a hung luhka in US tuanbia ah kum nobik Senator a panganak a rak si bal i Delaware ai-awh Senator ah kum saubik a tuanmi zong a rak si fawn.
Mr Biden hi Scranton khua St. Paul’s Elementary School ah sianginn kai a rak i thawk. 1955 kum, a mah kum 13 a si ahhin an chungkhar in Mayfield, Delaware ah an rak i thial.
Mi Holh-Aa Joe Biden
Joe Biden hi a hngakchiat lio ah a holh a rak aa ti a si. A hawikom nih nehsawhnak ah “Joe Impedimenta” (Joe phurh-rit pa) tiah an rak hauh tawn ti a si. A upat hnu pi tiang a holh a aa lengmang. Hi a holh aat nak hi thlalang hmai ah Biaza sau pipi zohlo chimnak in tei khawh a rak i zuam tawn ti a si.
A hung upat deuh tikah St. Helena School ah sianginn a rak kai than. Cu hnu ah Archmere Academy ah sianginn an rak cohlan hnu in sianginn aa thial. Hi sianginn aa thial hnu ahhin Biden nih biatak tein sianginn kainak tuition ca ah tiah sianginn thlalangawng thianh, pangpardum thianh a rak ttuan ti a si.
Archmere sianginn in 1961 kum ah graduate a rak la. Pa derthawm te, ttiattum lo te pumrua in a rak tthang mi Joe Biden cu an sianginn Archmere ah football team ah a min a rak thang ngai bal ti a si.
Sianghleiruun Kainak
Mr Biden cu High School a dih tikah University of Delaware ah sianghleiruun a rak peh. Hi sianghleiruun ahhin Mr Biden cu history le political science cawn a rak thawk. Hi caan lio hrawng ahhin Mr Biden hi sianginn ca nakin pumpululh, nungak le parties…tbk hi ka rak huam deuh tiah a chim bal.
Joe Biden hi 1961 kum ah US President John F. Kennedy nih president teinak inauguration biachimnak a rak tuah mi bia a theih thawk hin ramkhel lei ah thuk deuh in a ruahnak a pil than.
Nupi Thitnak
Tlangval Joe Biden cu Bahamas lei ah Sianghleiruun khuatlawn nak ah Syracuse University sianghngakchia nu Neilia Hunter he an rak i hmu ti a si. Cu thawk cun Hunter he an i duh i, Syracuse University Law School ah sianginn pehnak khua a khang. 1965 ah Delaware in degree a la. A kumvui ah Hunter he thitumhnak an tuah.
Ramkhel Luhnak
1968 kum ah Mr Biden cu Syracuse University Law School in Sihni a dih. Cu hnu cun Wilmington, Delaware ah ai thial. Hika ai thial hin Sihni riantuannak a thawk. Hi lio te hin Democratic Party ah chungtel sinak a lak cang ti a si.
1970 kum a phak tikah Mr Biden cu New Castle County Council chungtel ah thim a si. Councilman a tuan pah in Sihni rian zong a kemh chih.
Mr Biden cu Councilman tuan pah, Sihni tuan pah le pawcawmnak kawlhawl pah in chungkhar zong a zohkhenh pah. Cuticun fa pathum a hung ngei. A fale hna cu; Joseph Biden III (1969), Hunter Biden (1970) le Naomi Biden (1971) hna an si.
1972 kum ahkhan kum 29 telawng a si rih mi Mr Biden cu Democratic party nih ralchanh Republican party a simi Senator minthang J. Caleb Boggs cu dirawnh ding in an rak fial. Teinak ding ca ah ruanchannak a tlawm ngaingai buin Mr Biden a farnu Valerie Biden Owens nih campaigner a ttuanpiak i, a chungkhar dang hna nih thapeknak le telpi nak thawng in Senator zuamnak ah a rak i cuh.
Cu kum November thla thimnak ah Biden nih ruah lo pi in Senator minthang J. Caleb Boggs cu a rak tei diam. Cu ca ah US Senates tuanbia ah kum nobik a panga nak tuanbia a tial.
Nun Vansang Arak Au Mi Biden
US tuanbia ah Senator kumno bik tuanbia a tialtu Mr Biden cu Senator a ttuan kum 1972 kum Christmas lai te ah chungkhar puicimh vansannak a rak tong. Christmas thingkung (Christmas Tree) cawk ah ai thawh mi a nupi le a fale cu mawtaw khawndennak fak ngaingai an rak tong i cu eksidenh cun a thaisung Neilia Hunter le a fanu an nunnak a rak liam. A fapa ;e Beau le Hunter zong fak ngaingai in rak i hliam.
Hi lio ahhin Mr Biden cu hnemh awk tha loin zuun a rak tuar i, mah le mah thahnak khua zong ka rak khang bal ee tiah a chim. “Pathian nih ka cung ah hneksaknak fak tuk a tuah hrimhrim tiah ka thin a rak hung ee” tiah a chim.
A thaisung le fanu hniang ruak thlahnak, a fapa le siizung umpi ding hnuchit in Delaware mipi ai-awh awk ca ah tiah a chungkhar fialnak le hnemhnak thawng in mitthli le hnapduk he pasalpa Mr Biden cu Washington khua lei ah Senator biakamnak ah a rak kal.
Senate Tuannak
1973 in 2009 kum tiang, Mr Biden cu US ram pumpi nih thim mi Senator dirhmun in US rampi ca ah rian a rak ttuan. US Senate ah mi tampi upatnak a rak co. Senator a tuan chung ah Foreign Relations ah kum sau taktak a rak ttuanmi a si.
Mr Biden nih US Foreign Policy kong ah a dirhmun le arak kal pi mi chung ah Soviet Union cozah he hriamnam kong, Balkans kong ah remdaihnak a chuah khawhnak tibantuk ah raltha ngai in rian a rak tuantu a si tiah theih a si.
President Todan Le Biden Chunmang
Mr Biden hi US President cuhnak kong ah tutan lawng duhnak a ngei a si lo. 1987 kum ahkhan Democratic lawmakers minthang pakhat ah ai chuah cang. Cu tikah US President i cuh awk ah a rak i tim cang ti a si.
Mr Biden hi thluak lei aneurysms timi damlonak a ngei mi a si ti a si. Operation an tuah tikah a thi tom nih a cuap a phih ti a si than i, President cuh kho loin a caan a rak liam. Democratic primary election ah a dang president chim dingmi ca ai copy tiah report an tuah nak zong a rak um len. Cu ti cun Senator rian tu ah a kir than.
Vice President Todan Ah Kum Riat
Mr Biden nih US President cuh duh nak a rak ngeih mi kha kum 20 hnu zong ah a thin a thi lo. Kum 20 a rauh hnu 2007 kum ah ai tim than. Asinain, Democratic lei in Barrack Obama le Hilliary Clinton nih an hneh deuh ca ah a rak sung than. Asinain, Barrack Obama nih thla tlawmpal a rauh hnu ah ttanhawi (runnning mate) ca ah a rak i thim.
November 2, 2008 ahkhan cun, Barack Obama le Joe Biden nih Republican President mi thim Arizona Senator John McCain le Alaska Governor Sarah Palin hna cu fak ngai in an rak tei hna.
2012 kum zong ah Obama-Biden team nih Republican lei in zuamcawh tu Mitt Romney le Paul Ryan hna cu 60% in an rak tei thiamthiam hna. Cuticun, Joe Biden nih a chunmang pahnihnak Vice-president todan cu kum 8 chung a tlaih khawhnak a hung si.
1977 kum ahkhan Joe Biden nih a pahnihnak nupi a thit than. A min cu Jill Biden ti a si. 1981 kum ahkhan fanu te an ngeih. Ashley tiah min an sak. Joe Biden hi mi vanchia ngai a si. A nupi pakhatnak he an ngeih mi Beau Biden nih kum 46 a ti, May 30, 2015 thluak damlonak in a thih tak than.
Mr Biden cu January 12, 2017 ahkhan President Obama nih US ram ah a sang bik upat peknak pakhat a si mi Presidential Medal of Freedom a rak pek. “US Vice-president vialte lak ah a tha bik a si” tiah a rak conglawmh.
2016 kum US President thimnak lio ahkhan Obama hnuzul in President Donald Trump kha a rak zuamcawh rua lai tiah rak zumh ngai mi a si nain, Mr Biden nih a rak zuamcawh lo. Hilliary Clinton tu a rak chuak.
April 25, 2019 tu ahkhan US President kai cuh lai tiah Mr Biden nih thanhnak a rak tuah. Minute tawite biachimnak a tuahmi chung ah Mr Biden nih President Donald Trump cung a lung tlin lonak le Charlottesville, Virginia ah a rak cang mi miphun kar buaibainak kong ah fak piin a rak doh. “US ram tuanbia ah ka hmuh bal lomi rampi hnursuannak a si” tiah a rak zuamcawh.
September 2019 lio ahkhan President Donald Trump nih Joe Biden a fapa Hunter le Ukrainian cozah chawlehnak tuahnak kong ah hlathlainak tuah tiah soiselnak a hung um. Cuticun, US President thimnak ah Democratic lei in mithim Joe Biden le President Donald Trump biaraldohnak, a phunphung i ngiarnak in thimnak nih biakhiahnak a hun ser cang.
November 7 Ni, US thimnak in nili a rauh hnu ah Pennsylvania ramkulh ah Joe Biden teinak in Mr Joe Biden cu US ram ah 46nk US Presidenttial-elect ah fehter a si cang. Mr Joe Biden cu US ram tuanbia ah kum upa bik President a si i, US ram thimnak ah thimfung tambik 74 million votes in President sinak a hun co hi a si.
Source: Biography
