Kum 74 a ti ve cangmi US President Donald Trump cu COVID-19 zawtrai nih a tlak ruangmang ve cang. A nupi First Lady Melania Trump he Positive an si ruang ah quarantine ah chiah kan si tiah theih a si. Kum khua in a upa cangmi Trump hi COVID-19 rai mizaw hna lakah tihnung dirhmun a phan mi a si.
Trump hnuzul le naihniam bik um mi Hop Hicks cu COVID-19 nih a tlak ca ah anmah zong hi an zawtnak a si lai tiah ruah a si. Hope Hicks hi Air Force One in Presidential debate ah a kal tti mi pakhat asi. President Trump siibawi a simi Sean Conley nih thawngthanhnak a tuah ning ah cun a tutiang President Trump le a nupi hi an dam piang ko rih a ti.
Vawleicung ram hruaitu cheukhat hna chungin COVID-19 positive a si hna hi UK Prime Minister Boris Johnson, Brazil President Jair Bolsonaro an si.
President Donald Trump nih a ram mipi sinah COVID-19 kong ah nan lungrethei hlah tiah a ti hna hnu zarhkhat ah a mah zong positive a si ve. Hihi vawlei a hnintu thawng a si. US President thimnak nih le ni 32 lawng aa duh cang fawn.
President Trump cu quarantine in thlawpbul a si lai ca ah campaign pumhnak zong an khar cang. A ralaimi Presidential debate zong tlamtlin dawh a si ti lo. May thla lio ahkhan Vice President Mike Pence i thawngthanhtu secretary Katie Miller zong positive a rak si ve.
Nihin tiang US rampi chungah COVID-19 in mizaw 7.2 million an si cang i, minung 200,000 leng an thi cang.
