CBN News, 02 Oct 2020 : US Democratic Presidential candidate Joe Biden nih Amazon tupi sáwksâmtu ah Brazil a puh ruangah Brazil President cu Joe Biden cungah a thin ahang ngai ngai.
US Presidential candidate pahnih Donald Trump le Joe Biden debate an ngeihnak ah khan Joe Biden nih Amazon tupi ceureu tertu cu Trump le a hawipa Brazil president Bolsonaro a puh hna i Amazon tupi sersiamnak le hrinter nak dingah ramdang hna nih US dollars $20 million hlut hna seh law tiah a duhnak a chim.
Joe Biden biachimmi nih President Bolsonaro thin a phawh ngai ngai, Brazil ramchung thil le economy ah Joe Biden rak i thlak lo dingin a duhnak a chim i cuhlan US – Brazil i pehtlaihnak le i hawikomhnak hrawk kho lei i bia chim tilo dingin Bolsonaro nih Joe Biden bia a cah.
Joe Biden nih hin Trump he debate an ngeihnak ah Trump foreign policy chiat ning tahchunhnak ah Brazil khi zoh ding a siko tiah Brazil tupi tha Amazon tupi cu Trump le Brazil President ceureu termi ah a puh.
Kan hnungkum 2019 ah khan Amazon tupi hi fak ngai i arak kang, a kanghnak ruang fiangfai in theih a silo.
Mithiamsang hna nih an chim ning ah Vawleicung Oxygen 20% hi Amazon tupi nih a chuahpimi an si, kan hnungkum ah khan fak tuk in a kangh ruangah pawngkam thil ummi hna caah harnak tampi a chuah an zumh.
CBN News
