Vawleicung COVID-19 raipi karhnak le mi thihnak a tambik nak US ram ah US le Germany company hna nih i bawm in an tuah mi Pfizer COVID-19 khamsii cu zualral (emergency) hman ding khamsii ah US ram U.S. Food and Drug Administration nih a theihpi cang.
A tulio US ram ah COVID-19 zawtnak ruang ah minung 295,000 an thi cang. Minung nuai 16 leng nih zawtrai an i chawnh cang tikah COVID khamsii hmannak ding ca ah hneksaknak dot thum a dih cang mi Pfizer cu hmanding ah an hun lungtlin pi hi a si.
A tu ah chimcaih a tong ngai mi Pfizer khamsii hi COVID rai ca ah 95% cu a khamh khawh tiah Pfizer – BioNTech nih an thanh.
Relchap: Vawleipi Nih Ruahchan Cio Mi COVID-19 Khamsii Pfizer Cu Zeidah A si?
US President Donald Trump nih cun a ralai mi suimilam 24 chung ah COVID khamsii Pfizer hi chunh hram kan thawk cang lai tiah a chim. “Nihin kan rampi ah COVID-khamsii kong he pehtlai in khuaruahhar thil kan hmuh. A ralai mi thla 9 chung bak ah chunh khawh dih kan zuam lai” tiah a chim.
A tulio vawleicung ah Pfizer hi UK, Canada, Bahrain le Saudi Arabia ram hna nih cun zualral ca hman ding ah an cohlan cang mi a si. US ram cu COVID-19 zawtrai kong ah fak ngaingai in an tuar liopi a si. Kan hnu nithum ni ahkhan nikhat chung te ah minung 3,000 leng mithi an um. Cucu vawleicung ah a tambik record thar a si.
Source: BBC
