US ram Justice Department nih a luancia kum 2004 lio ah a rak cang mi tuksum mithah nak kong ah a sual tu nu Lisa Montgomery cu thih a tlak tiah bia a caih piak cang. Hihi US ram biacaihnak tuanbia ah kum 70 deng hnu ah a voikhatnak nu thiding biacaihnak a tuah a si.
A ralaimi November 8 ahkhin Indiana ah lethal injection timi “thih sii” an chunh lai.
Lisa Montgomery timi nu hi 2004 kum lio ahkhan nau a pawi mi nu pakhat cu a hrom in a rak dihthah. A naupaw cu namte in a rak virh i, thla 8 a fa cu a rak i lak.
Lisa Montgomery kong hi Department of Justice nih a thanh ning ah cun; December 2004 ahkhan uite cawk awk ah Kansas in Bobbie Jo Stinnett timi pa inn ah a rak kal. Hmun a phak tikah innchung ah a um mi naupawi nu Stinnett cu a va velh. Fak ngai in a velh tikah a lung a fim lo ti a si. Cu hnu ah coka namte i lak in naupawi nu paw cu a hlai. Hi lio ah Stinnett cu a lung a fim nain Lisa Montgomery nih a thi lak in a tuah. A naute cu a lak.
2007 kum ahkhan biacaihzung nih thi ding in bia an rak caih nan, Lisa Montgomery a Sihni pa nih Lisa Montgomery hi a hngakchiat lio ah velh a rak tong i a thluak a rawk mi a si tiah a rak hal hna ruang ah a rak luat.
US ram ahhin 1953 kum ahkhan Bonnie Heady ti mi nu cu thih tlak biacaih le biakhiah a rak si i, Missori gas chamber (thihnak siivawi khandal) ah an rak thah.
Kan hnu kum ahkhan President Trump cozahnih Federal biacaihnak ah thih tlak sual biacaihnak cu pehzulh ding an rak fehter.
Source: BBC
