CBN News, 21 Oct 2020: US President thimnak ngeih dingmi i candidate, Republican Donald Trump le Democrats Joe Biden hna cu October 22 final debate an ngeih dingmi Topic (tlangtar) kong ah bia an i el.
President Trump campaign tu hna nih debate tawlreltu hna cu topic ah foreign policy kemhchih lo in Democrats lei bawmhchanh timh ah an puh. Hi lio ah Biden campaign tu hna nih Donald Trump cu Coronavirus doh kong ah a rianțuanmi kong biahnak chuahpi duhlo ah an puh ve.
Candidate pahnih hna hi thaizing 22 oct ah final debate an ngei lai, hi lio ah debate bia raldoh dingmi Topic cu moderator le NBC news correspondent Kristen Welker nih a rak thanh cang.
Final debate nak ah an bia raldoh dingmi an thanhmi cu – American families (American mipi chungkhar kong), Race in America (America ah miphun uhțanh/thleidan kong), Climate change (khuati i thlen kong), National security (Ram le miphun runvennak kong) le Leadership (i țhithruainak kong) hna an si.
Debate zulhphung thar ser a si
Donald Trump le Joe Biden hi debate hmaisa an rak ngeihnak ah bia an chim lio biatakte in an i buaiban hnawh, bia dawhcah lo in an i thangchiat. President debate rak ngeih cangmi vialte lak ah zoh dawh lo bik tiah chim an si, ram mipi nihsawh zong an i huah. Debate voi 2 nak Oct 15 i ngeih dingmi tu cu khensel a rak si.
Candidate pahnih hna sullam ngeilo i bia i elbuainak ruangah debate tawlreltu, Presidential Commission on Debates nih zulhphung thar a ser.
Zulhphung thar
Minute 90 chung debate ngeih dingmi ah topic pakhat chimnak ah caan minute 15 veve onh an silai, Candidate hna nih an policy kong chim dingin minute 2 veve caan pek an si i hi chung ah bia an i tan piak lonak ding ah pakhat deuh paoh microphone thah (off) piak an si canglai. Minute 2 hnu ah open discussion caan on a silai i hi chung tu ah cun an microphone on piak veve an si canglai.
Vote rak pe ciami an tam
November 3 hi vote thlak ni a sinain a hlankan in vote rak thlak cia chung khawh a si, minung 30 million nih vote an thlak cia cang.
US ram Covid-19 pulhrai ruangah vote thlakni i mipi tamtuk dingmi an phan ruangah vote thlakcia mi an tam, kum 2016 lio ah khan cun vote thlakni phanh hlan i vote rak thlakcia mi minung 6 million lawng an rak si.
Zarhhnih lawng election ni phanh nakding ah ai duh cang, mipi ruahning an khawmh hmahnun biknak ah cun Joe Biden lei țangmi an tam.
CBN News
