Ukraine le Russia kahdohnak chung ah Ukraine nih American ser mi hriam pawl cu Russia ram chung tiang hman nak nawl a ngei tiah Joe Biden hruaimi American cozah nih nawl a pek kong reuters thawngzamh nih a langhter
A tu bantuk in Joe Biden hruaimi cozah nih nawl a pek mi hi Russia ral bawm dingin North Korea ralkap zeimawzat ralram i an kal caah a si i caan rau lo ah Ukraine nih kahdohnak a kalpi lai tiah an langhter.
Hi kong he pehtlai in Russia cozah senator Vladimir Dzhabarov nih “ Hi biakhiahnak nih hin ralpi pathumnak a chuahpi khawh.” tiah ralrin a pek bantukin Senator Andrei Klitschko zong nih “ Nitlak ram lei hna i an biakhiahnak ruangah hin Ukriane ram vutcam ah a cang kho” tiah Telegram in a langhter ve.
Russia ramchung tiang kahnak nawl pek a si hnu ah Ukraine nih a hman hmasat cem te ding mi American hriam cu meng 190 tiang a kap kho mi ATACMS missle pawl a si men lai tiah ral lei thiam sang na nih an chim.
Hi kong he pehtlai in Trump hawikom a si mi Rechard Grenell nih cun “ Biden cozah nih hin an rian a dih lai ah hi ral hi a zual deuh dingin an tuah bia a si.” tiah X cahmai ah a tial.
