Rakhine ram peng 9, Shan ramkulh peng 6 leng ah Kachin ramkulh, Karen ramkulh, Mon ramkulh, Pegu ramtthen a dihlak peng 40 hrawng ah cun, a dikfel mi thimnak ai tuah kho lailo tiah thimnak tuah lo ding in Union Election Committe nih nizaan October 16 zaanlei ahkhan a thanh.
Cu ruang ah tukum 2020 thimnak ahhin 2010 le 2015 a pahnih fonh in thimnak tuah khawh lo nak ding hmun a tam deuh. 2010 kum ahkhan thimnak tuah khawh bak lo nak hmun hi “Wa” hmunhma peng 4 le NDAA kuttang ah a um mi Mongla peng lawng ah an si. Ramkulh Hluttaw ca ah thimnak tuah khahw lo nak ding hmun 12 lawng a si.
2015 kum ahkhan a cunglei hmun hna le Maingsho, Kyethi peng pawl le a cheuchum tuah khawh lonak hmun 31 an rak um.
Rakhine ramkulh chungah Pauktaw, Ponna kyun, Yatehtaung, Maungdaw, Kyaukdaw, Minnpya, Maypnoe, Mrauk-Oo pawl hna ah a ningin thimnak aa tuah kho lai lo tiah UEC thanh mi ah an i tel. Hi hmun pawl hi 2015 thimnak ahkhan Rakhine miphun party nih a teinak hmun deuh lawngte an si.
Asinain, nizaan nai October 14 ah NLD Candidates pawl AA nih an tlaih an tonnak Taungkauk ah cun peng huap in thimnak tuah lo an ti lo.
Shan ramkulh ah cun 2010 le 2015 bantukin Autonomuos ‘Wa” hriamtlai kuttang um peng 4 le Mongla peng 4 hna cu thimnak tuah khawh a si lailo. Khuaruahhar ngai a si mi cu thimnak ah ai cuh ding min hrimhrim an pe lo ti a si. Shan ramkulh chungah thimnak tuah khawh lonak peng 17 in record thar an ttial.
Tukum ah UEC nih a thanh mi thimnak tuah khawh lonak hi hmun 50 leng a si. Cu ruang ah thimnak tuah khawh dih tikah President thimnak ca ah hin thutdan hmun 664 a tling te lailo timi cu a fiang.
UEC nih a tu bantuk a thanh mi kong ah Tlangcung party hna le ralchanh party chungtel tampi nih an soisel. An mah (NLD) nih tualupa (dailuci) an ttuan i an duhning in khua an khan. Kan sung lai an ti nak paohtuah loin an chiah tiah an ti cio.
Source: BBC
