Thong in a zaam tiah September 29 ah tlaih a si mi UDP Chairman U Kyaw Myint cu September 29 ahkhan Yangon khua Pann Hlaing Apartment ah Palik nih an tlaih i, Mandalay khuapi thonginn U Bo Thonginn ah khumh a si cang tiah theih a si. Hi Mandalay U Bo Thonginn hi U Kyaw Myint a rak tlaknak thonginn a si. An tlaih hnu suimilam 24 chungah hi thonginn ah an khumh hi a si tiah Myanmar Now nih a thanh.
Kum 69 a si cangmi U Kyaw Myint hi thongzaam sinak le Sualhuah phung dal 224 in tlaih a si. Sualphawtnak phung pahnih buar in tlaih a rak simi U Kyaw Myint hi 1999 kum, January 19 ahkhan Mandalay khuapi siizung ah a dam lo tiah chiah a si i, a congtu palik Lu Maw timi pa he an rak zaam. Thong in a zaam hnu, 2013 kum ahkhan ramchung ah a rak lut than i, ramchung luhnak nawl hi U Thein Sein cozah nih nawl an rak onhmi a si tiah theih a si.
U Kyaw Myint party a si mi UDP hi 2020 thimnak ah Palai 1130 tluk thazaang he thimnak a lut mi party ngan a si. A tulio ah cun Party Chairman tlaih a si tikah Party chimrelnak nawl phih chung a si tiah theih a si.
