Nizaan nai hrawng Myanmar ramkomh 2020 thimnak hnuzul in a hung buai cuahmah mi tihrah cu Tatmadaw lei nih uknak lak ding timi le 2008 phunghram hrawh ding ti mi bia tiang a hung chuak cang.
Thawngpang hram: Tatmadaw Nih Rampi Uknak Nawl A La Lailo Tiah Ruah Khawh A Si Lo
Nizaan January 27 ahkhan Tatmadaw luzik General Min Aung Hlaing nih 2008 phunghram hi zulh lo ahcun hrawh ding a si ti mi bia le Tatmadaw thawngfianhnak ah Major Zaw Min Htun nih Tatmadaw nih uknak lak lo ding a fiang lo tiah a chim mi cung ah ram mi lungbuai in a tuah hna.
Hi kong he pehtlai in Ramkhel lei ah thiamsang Kyaw Myint nih, “hihi Upadi kong buainak a si ti lo. Ramkhel buainak a si cang. Ramkhel cabuai ah siamremh ah a tha bik. Kaphnih i tong in siam remh ko tuah u” tiah a chim.
“COVID-19 raipi a dih tikah Myanmar ram hnih a ton ding mi hi 1930 le 2007 hrawng ah a rak cang mi Great Depression lio nakin a fak deuh kho. Hi lio ah aa-naa an ting ahcun a zual chinchin ko lai. Keicu ralkap nih uknak an lak ding mi hi ka duh piak hna lo” tiah a chim chap.
General Min Aung Hlaing: Phunghrampi Nan Zulh Lo Ahcun Kan Hrawh Lai
Myannar ram ah tuanbia he pehtlai in ralkap nih uknak lak ti mi hi phun hnih in a um. 1958 kum ah uknak an rak lak lio ahkhan hluttaw hrawk loin ralkap nih uknak an rak lak. 1962 kum ahkhan a zapi, hluttaw pahnih ningin hrawh le uknak lak tlamtling in an rak lak. Tutan ah uknak la hna sehlaw 1958 kum uknak lak lio hluttaw hrawh loin uknak lak bantuk kha a si kho bik tiah U Kyaw Myint nih a chim.
A ruang cu 2008 phunghram hi ralkap nih hluttaw a tlaih khawh nak hnga ser mi a si ca ah hrawh ding hi an i tim lai lo tiah ka ruah. 1988 kum lio uknak lak kha cu a sawhsawh a si lo. Kha lio ah tuanvo ngei mi President le ralkap nih theihthiamnak in ralkap uknak an rak lak a si tiah a chim.
Source: BBC
