Ralhrang cawlcanghnak ca ah forhtu bia a chuahter than ruang ah tiah Twitter nih US President Trump i hman mi account cu an thah piak lan cang.
President Trump twitter a hman ning le ca a tar ning kong hi phungphai lei a thiam mi hna le Congress palai pawl hna nih nikum lio te khan phihpiak ding ah an rak hal ngai cang mi a si.
Zeiruang Ah Dah Trump Account An Thah?
President Trump a tanhtu hna nih US Capitol Hill chung ah lut in ralhrang bang thil an sual ruang ah President Trump cu Twitter nih suimilam 12 chung a hman mi Twitter account an phih piak.
Hi buainak ahhin Palik pakhat le mipi chung in dihlak minung 5 nunnak a liam. US tuanbia ah ai dawh lo bik mi ni a si tiah an chim cio. Hi tikah Trump cu Twitter lei nih kan zulhphung na buar rih ahcun kan in phih piak lan lai tiah ralrin an rak pek cang.
Suimilam 12 hnu ah Twitter nih an hun piak than tik ah President Trump nih voi hnih a post manh. Cu ca a post mi ruang ah cun Twitter company nih US President Trump a hman mi twitter an thahpiak lan.
Zei Ko Dah A Post?
Twitter nih President Trump twitter an hun piak tikah a pakhatnak a post mi cu, “Thimfung a ka petu nuai 75 a simi American ram dawtu vialte hna i an duh taktak mi cu a ralai mi caan ah nan theih telai. An mah hi upat lo in le ningcang loin nan tuah hna awk a si lo” tiah a tial.
A dang pakhat cu aralai mi January 20 ah tuah ding mi President thar Chiatserh Biakam Ni ah kai tel lai lo ti mi ca a post. Hi zawn hi Twitter nih cun, thimnak phichuak hi phunglut a si lo timi ruahnak kha mipi sin ah a ronh hna bia a si tiah an chim.
Cu ca pahnih cu an zoh tikah ralhrang cawlcanghnak le forhfialnak thapek a si ca ah tiah President Trump cu twitter cung in an tthawl. President Trump hi twitter cung in nikhat ah a tlawm bik voi 5 in a cunglei ca a thlah mi a si i, follower 89 million lengkai a ngei mi a si.
Source: BBC
