Tuluk ram Sinovac Khamsii serchuah mi COVID-19 khamsii nih zawtnak a kham khawh ning cu zatuak 50% lawng a si tiah Brazil ram researh a tuahtu hna nih an thanh.
Tuluk ram ah COVID-19 khamsii chuahnak lei ah ai zuam cuahmah mi Sinovac khamsii cu COVID-19 a kham khawhnak ding ah zatuak 50.4% telawng a si tiah Brazil ram COVID-19 khamsii hlathlaitu hna nih an thanh tikah Brazil ram cu mitampi an lung a rawk ngaingai te ti a si.
Cu leng ah Brazil ram Scientist pawl nih hibantuk thawngthanhnak report an tial ding mi hi voithum tiangtiang an rak tlai bal cang. A ruang bik pakhat cu Sinovac khamsii he lungtlinnak min an thut lio ah biathlithup catlang ai tel tiah an chim.
Tuluk chuah mi COVID-19 khamsii Sinovac hi a hlan ah 78% hrawng a khamh khawh lai tiah Brazil thiamsang hna nih an rak thanh bal. Turkey ram zong nih 91.25% a kham khawh tiah an rak thanh ve hoi. Indonesia nih cun 65% a kham khawh tiah an rak thanh.
Tuluk nih Sinovac an chuah mi hi ram kip ah an kuat i, hneksaknak a dotdot an tuah. Zawtnak a karhnak ram deuh ah volunteer minung an chunh hna i cucu ram cio cozah nih fund a pek mi ngandamnak thiamsang phu hna nih hlathlainak an tuah hnu ah zatuak a kham khawh zat kha an thanh.
Tuluk ser Sinovac thawngpang a chuah tikah an lung a rawk ngaingai. Asinain, Brazil ram ahhin Sinovac lawng siloin Pfizer, Moderna zong an chunh ve cang hna ti a si.
Hun relchap awktlak Capar: Tuluk Chuak COVID-19 Khamsii Zeidah A Lawh Lai?
Source: CNA
