Tuluk ram Shangdoung ramkulh suikhur pakhat cu January 10 ahkhan a cim i, suikhur chung ah ai erhkhumh mi miung 9 cu chanh kho loin an nunnak a liam tiah Tuluk ram nawlngeitu hna nih an thanh.
Hi suikhur cimhnak hi Januarty 10 ahkhan a cang mi a si. Vawlei tang pe 2000 ah sui an cawh cuamah lio ah suikhur a cim i, hi chung ah January 24 tiang minung 11 an chanh khawh hna ti a si.
Minung pakua hna cu chanh manh loin an nunnak a liam i, pakhat ruak cu a tutiang an hmu kho rih lo ti a si.
Vawleitang pe 2000 ah suikhur a co mi hna hi ruah lo pi ah an suikhur ka cu puahkehnak pakhat a can hnu ah an khurka a pit i, vawlei nih a chilh kanh dih hna ca ah zarhhnih chung vawlei tang ah an um ti a si.
Vawlei tang ah zeitindah zarhhnih chung an nun khawh?
Suikhur ah a tuan mi hna hi zeiruang set ah suikhur a cimh timi an thei lo i puahkehnak pakhat a can hnu ah an khurka a pih lawng an hngalh. Cu hnu cun pehtlaihnak vialte an cat dih ti a si.
Zarhkhat chung cu an nung lai tiah ruahchannak an ngei lo. Asinain, January 17 ahkhan kua chung ah hri an thlak mi pakhat cu a chunglei in an hun dawh i, cu hri ahcun minung 11 kan nun tiah cate an rak tial hnu ah minung 11 an nun hi an theih ti a si.
Suikhur cu kua an vih i, tikuluk le mama an thlak hna hnu in January 24 ah minung 11 cu him tein leng ah an chuah khawh hna. Suikhur chung um mi a dang 9 hna cu zeitindah an thih ti mi fiang in thanh a si rih lo.
Tuluk ram ahhin Lungkhur, suikhur cimh le thih loh hi khuaruahhar a si tilo ti a si. A luancia December thla zong ahkhan Chungqin peng lungmeihol khur ah Carbonmonoxide khuvai a zut i minung 24 an rak thi bal.
Source: BBC
