Thawngpang hram: Australia Cozah Le Tuluk Cozah Pehtlaihnak A Chia Lei A Panh
Tuluk cozah ramdang pehtlaihnak zung Foreign Ministry chimrelnak nawlngeity Geng Shuang nih Afhganistan ah Australia ralkap pakhat nih hngakchia thah a timhnak hmanthlak deu kong ah Tuluk nih Australia ngaihthiam kan hal kho hna lo tiah lehnak a tuah.
Australia cozah le Tuluk cozah ramhnih karlak pehtlaihnak cu a tulio ah a chiat lei a panh cuahmah lio ah Australia cozah nih a kan mawhchiat mi hi thil a zual tertu a si tiah Geng Shuang nih a chimchih.
Australia ram nih ramdang ah a thlah mi ADF ralkap nih Afhganistan ram ah thongtla minung 39 thahnak ah ADF ralkap minung 25 an i tel tiah Tuluk cozah nih a phuan. Hihi 2009 in 2013 karlak ah a rak cang mi a si i, Tuluk cozah nih fak ngai in Twitter cung ah hmanthlak deu he a langhter.
Australia PM Scott Morison nih cun Tuluk nih hi hmanthlak an tar mi hi an ning a zah ngai awk a si i, ngaihthiam an kan hal awk a si tiah a chim.
Hi hmanthlak kong hi a tulio Social Media ah a lar ngaingai mi a si i, New Zealand ram cozah zong nih Tuluk nih a herh lo mi a tuah tiah soiselnak a tuah.