Mongolia chunglei (Tuluk ram lei) ahhin Tuluk cozah nih Tuluk holh kong he pehtlai in Policy a chuah mi cu Mongolia ramngeitu mino hna nih an duh lo ruangah lam an chuak i, Tuluk cozah nih a tlaih hna. Cu tlaih a tongmi hna thlah awk ah Mongolia khualipi Ulaanbaatar ah mipi an chuak i dulonak an langhter.
Ulaanbaatar Khualipi hi a rauh hlan ah US ram ramdang Vuanci Mike Pempeo a rak tlawng ding a si. Mongolia ram he innpa a si mi Tuluk ram ahhin Inner Mogolia timi Tuluk ramchung Mogolia ramkulh a um. Hi ramkulh ahhin kan hnu ahkhan Tuluk cozah nih Ramkhel, History le Caholh timi Major pawl hna cu Mongolian holh/ca in cawng loin, Tuluk Mandrin ca in cawn ding Policy an chuahpi.
Hi policy hi Mogolia mipi nih an duh lo ca ah Sianginn buainak le mipi buainak tiin a zarhzarh in buainak a chuak cang. US Ramdang vuanci Mike Pempeo cu Japan, South Korea le Mongolia ram hna hi tlawn dingin hmaizarh chung hi ai tim tiah theih a si. Tutan Mike Pompeo nih Asia a tlawnnak ahhin Tuluk ram a tlawng chih lailo.
COVID-19 rai ruangah Mask ai vuah mi mipi a thong le nuai hna cu Tuluk nih ramngeitu mipi hna cung ah sersatnak a tuahmi hi kan duh lo tiah fak piin duhlonak an langhter. US Ramdang vuanci Mike Pompeo nih “Tuluk hi mitlawm te miphun a simi hna kha Han miphun si ding ah a namneh hna” tiah a rak chim bal.
A tu bantukin Tuluk cozah nih thil a tuahmi ruangah Mongolia miphun holh/ca hna hi a tlau telai i, ramngeitu miphun hna an holh zong a ci a mit lai tiah an thin a phang ngaingai.
