A tulio Vawleicung hrirai pi he vawleicung sii lei company kip nih COVID khamsii chuah an i zuam cuahmah lio a si. Tuluk ram ah sii lei company pakhat a si mi Sinovac zong nih COVID khamsii cu an chuah ve cang i, vawleicung COVID khamsii pawl ah hmaisuang dirhmun ah a dir cang. Hi COVID khamsii hi vawleicung ramdang cio zong ah an kuat cang ti a si. Tuluk ram chuak COVID khamsii hi zeidah a lawh tiah biahalnak a chuak ngai.
Tuluk ram Bejing khuapi ah hrambunh in COVID khamsii a chuah tu company Sinovac nih an chuah mi COVID khamsii hi CoronaVac tiah an kawh i, Indonesia ah cun mipi an chunh cang hna lai tiah theih asi. Cu leng ah an kuat cia mi leng sing hleiriat zong an kuat tthan hna lai tiah an chim.
Asinain, CoronaVac hi Zawt khamsii hneksaknak dot thumnak zong hlawh tling rih loin bangbat a ngei mi a si tikah Tuluk chuak CoronaVac hi a ttha taktak ko maw tiah biahalnak a um mi cu a si khun.
Relchap: COVID Khamsii Ngahnak Ding Ah Zeitluk Dah Aa Duh Cang?
A dang COVID Khamsii le Sinovac an i dannak zeidah a si?
CoronaVac hi COVID-19 hrik a thi cia mi kha lak in an ser mi a si tiah theih a si. A nih hi minung takpum chung a phak tikah minung nih zawtnak innkhawhnak Immune System kha a tthawnter ti a si. Cu leng ah sii nih a chuahpi mi Side Affect zong a tlawm deuh ti a si fawn.
Moderna le Pfizer hna hi mRNA timi phun in chuah mi an si. A sullam cu COVID-19 virus i ai ngeih mi nunnak code kha lak in an tuah mi a si. Cu sii nih cun Protein dat a chuahter. Cu protein dat nih cun Coronavirus taktak takpum chung a luh tikah a rak tei khawh ti khi mRNA khamsii phun i a riantuanning cu a si.
Tuluk nih an chuah mi Sinavac hi cu a hlan ah Khamsii pawl an chuah ning phungzulh in an tuahchuah mi a si. Tahchunhnak ah uihrut khamsii tepawl hna zong khi hibantuk ningzul in an tuah ti a si. A dang Mordena le Pfizer hna hi cu mRNA timi in an chuah. Vawleicung ah mRNA ningzul in khamsii an chuah i an hlawh a tling ti mi hi vawleicung a um rih lo ti a si.
Sinovac hi Oxford University nih an chuah mi bantukin tikhal kuang -2 degree hrawng ah chiah khawh a si. US khamsii pawl hi cu -20 le -70 hna ah chiah a hau mi an si ca ah kuatchanhnak a har ngaingai dirhmun ah an um.
Relchap: COVID Khamsii Ciocio Zeidah An I Dannak?
Sinovac Cu A Tha Taktak Kun Lai Maw?
Sinovac hi hneksaknak dot hnih tiang an hneksak dih cang. A dotkhatnak ah minung 144 an chunh hna. A dot hnih ah minung 600 an chunh hna. A dot hnihnak an hneksak dih ah hin Lancet Journal nih cun zualral (emergency) ca ah cun hman awk a tlak cang tiah an tial.
September thla ahkhan vawleicung ah COVID mizaw an karh biknak ram pakhat a si mi Brazil ram ah Volunteer minung 1000 sin ah hneksaknak an rak tuah. Hi lio ah ruah lo piin an hneksak mi minung pakhat a thih ruang ah an riantuannak vialte an dinhter chung. Hlathlainak an hun tuah than tikah a thi mi kha Sinovac ruang ah a si lo ti an hmuh tikah an khamsii chuahnak an pehzulh than ti a si.
Hi Khamsii Hi Zeitluk Dah An Chuah Khawh Lai?
Tuluk cozah media pakhat a si mi CGTN ah Sinovac company in lutlai nih an biaruahnak a leh ning ah Sinovac khamsii hi kumkhat ah dur nuai 300 kan chuah khawh lai tiah a chim.
Hi khamsii hi minung pakhat voihnih cio chunh a si lai ca ah dur nuai 300 an chuah hmanh ah milu nuai 150 lawng chunh khawh a si hnga. Milu nuai 150 cu Tuluk milu cheukhat cheukhat tluk telawng an si fawn.
Relchap: Vawleipi Nih Ruahchan Cio Mi COVID-19 Khamsii Pfizer Cu Zeidah A si?
COVID Khamsii Le Vawleicung Sipuazi Zuamcawhnak
A tulio ah Tuluk nih an chuah mi Sinovac khamsii cawknak ahhin Tuluk ram president Xi nih cun Africa ram cu $2 billion cawih ding in bia a kamh hna ti thawng a chuak. Cu pin ah Latin America ram zeimawzat zong $1billion cawih ding in bia a kamh hna timi thawng a chuak.
Cu ca ah COVID khamsii chuahnak le vawleicung sipuazi zuamcawhnak Diplomacy ah Tuluk nih hmai a suang ngaingai tikhawh asi. Micheu nih cun Tuluk nih nunkhamhnak le ramkhat le ramkhat pehtlaihnak hmang in Tuluk nih Sipuazi miaknak a kawl tiah an chim ve.
A tulio ah Sinovac hi a man hngalh khawh a si rih lo nain micheu nih an chim ning ah $40 hrawng si dawh a si. Indonesia cozah nih an chuah mi Bio Farma hi $13 man hrawng a si. Oxford University nih an chuah mi tu cu $4 lawng a si lai tiah ruah a si.
US company nih chuah mi Mordena hi 2021 chung ah dur nuai 500 chuah ding in ai tim i, Oxford hi 2021 March thla dih ah cun dur nuai 700 chuah ai tim ve.
Relchap: UK Ah Pfizer Khamsii Ai Ziak Lo Mi An Um Manh
Tuluk nih COVID Khamsii dang a chuah ti maw?
Tuluk ram ah COVID khamsii chuah ai zuam mi hna hi an um len. Hi chung ah a hnubik hneksaknak a phan mi hi phu 4 an si.
Cu lak ah Sinopharm ti mi khamsii cu Emergency in Tuluk cozah nih minung nuai 1 cu a chunh cang hna tiah theih a si. Hi sii hi 89% cu a khamh khawh tiah an chim. Nizaan nai December 9 zong ahkhan UAE ram ah phunglut COVID khamsii tiah nawl an pek cang mi a si.
Asianin, nitlak ram ah cun hneksaknak dot dih loin mipi sin ah cu vialte chunh cu cohlan awk a ttha lo tiah mi tampi nih Tuluk ram an soisel.
Relchap: A Pakhatnak COVID Khamsii UK Ram Ah An Chunh Cang
Source: BBC
