COVID-19 zawtnak rai nih a phak ve mi US President Donald Trump cu mi tampi nih a dam khawhnak ding ca ah thla kan in campiak an ti lio ah a thihnak ding ca ah thla a rak cam mi zong an rak tlawm ve lo. Social Media platform pakhat a simi Twitter ahhin Trump thi seh tiah ca a post tu hna an ca cu kan delete lai tiah a thanh hna.
Twitter Company nih cun ca a post tu hna an account dihlak cu hmalak in dantatnak kan tuah kho lailo nain, Trump account tag tuah in ca a post tu ca poahpaoh cu delete an si lai tiah an thanh. Hi ca post tu hna chung ahhin Democrats in Congresswomen zong an i tel.
“The Squad” tiah rak kawh mi Trump nih fak ngai in Social Media in a rak ti bal mi Alexandria Ocasio-Costez, Rashida Tlaib, Ilhan Omar le Ayanna Pressley hna hna hi twitter in Trump thih duhnak ca post mi kong ah twitter an buai hnawh ve. Kanmah thih duhnak ca post tu cu nan hnawh tung lo tiah biahri an tirh ve hna.
President Donald Trump le a nupi Malenia hna cu COVID-19 rai positive an si ruangah a luancia zarhchung ahkhan Walter Reed siizung ah thlawpbul an si.
Source: CNN
