Kum 244 chung US cozah tuanbia ahhin President nih White House kaltak a duh lomi US President pakhat hmanh an um rih lo.
US ram Democracy hmelchunhnak pakhat a si mi cu phung le lam he ai ruang tein cozah kaithar le a hlun dai tein i thlen hi ai tel ve mi a si. Asinain tukum 2020 US President thimnak ah President a tuan lio mi Trump nih a zuamcawh tu Joe Biden a sungh i Trump nih a cohlan lo tikah US mipi an thin a phan.
Cu ruangah US ram ah ton bal lomi kan tong sual telai maw tiah ramkhel khuaruat tu tampi an chuak ve. US ram thimnak ah Joe Biden nih teinak a hmuh tiah November 7 ahkhan US media pawl nih an thanh lio ah President Trump cu Washington khua kiang ah Golf a tu ti a si. Hi thawng a hun than cangka in President thimnak Komiti nih “thimnak dih rih loin tuah ding (phisin) ding a tam tuk rih” tiah cathanh an chuah ve.
Mr Trump nih, “Thimnak ah teinak a hmu bantuk in velhle in i umter ding ahhin ziah hme Biden hi aa ngaih tuk hna. Amah bawmchantu Media pawl zong nih khuaruahhar in an bawmh ti zong kan hngalh fawn ko. Hi hna pawl hi thil dik chuahter ding a duh lomi an si” tiah a chim.
A tulio ah cun thimnak ah thimfung diklo kong biacaihnak cu ramkulh pakhat hnu pakhat biacaih zung ah a phisin cuahmah lio ti a si. Trump nih phung la lam hmang in thimnak ah thimfung dik lomi phisin nak lam zeimawzat a ngei ve fawn. January 20 tiang ah biacaihzung ah thimfung diklo kong cu biacaihzung a phisin khawh lo ahcun White House in a chuah taktak a hau te ding mi khi a si.
President Trump i President ttuannak caan hi January 20 chunlaicir ahkhin a dih te ding a si. Cucu US ram phunghrampi ah fiang tein khiah chih mi a si. Atu tiang ah US ram President thimnak ah a herhmi electoral college 270 cu Joe Biden nih a ngeih cang fawn.
President Donald Trump nih thimfung kawlnak a tuah lio zong ahhin ka sung lailo, ka sungh hmanh ah thimfung diklo ruangah a si lai a rak chim lengmang cang. Cu ca ah Trump nih a sungh mi cohlang loin President power hi i tlaih peng sehlaw zeidah a cang kho timi cu US ram ah caihphai a tong ngaingai mi ah a hung cang ve.
A luancia June 11 ahkhan African US um capo saih thiam Trevor Noah nih Joe Biden he i tong in capo a rak saihnak ah Trump hi thimnak ah sungh duh loin White House in chuah duh lo phun in um dawh a si in na ruat maw tiah a rak hal lio ah Biden nih “ka ruah ko. cu phun cu a si” tiah a rak leh bal.
Hi bantuk thil a can ahcun Mr Biden nih, “Trump hi dantat a hau ko lai. President si kho lo ding in ralkap nih rian an ttuan lai. Cun White Houe in an tthawl lai” tiah a chim.
Mr Biden le a phu pawl nih cun, “thimnak result timi hi Presidential candidates pawl nih an tuah mi a si lo. Ram mipi nih an tuah mi a si” tiah nizaan zong ahkhan an thanh cang.
US ram President thimnak result a hung i fian pah i Mr Biden nih elected-president sinak electoral college a ngah thawk khan Mr Biden cu Secret Service nih a himnak ca ah biatak ngai in an humzual cang ti a si.
Mr Trump zong hi Secret Service thiamthiam nih White House in a chuah duh lo ahcun leng ah an chuah lai i a himnak ca ah a nunchung tuanvo an lak ding khi a si. A luancia President hlun pawl zong hi Secret Service nih an himnak ca ah tuanvo an lak hna.
Atulio US ram ahhin President Trump a sung loh tiin hriamnam he lamcung ah a chuak mi zong an um len ti a si. Cu ralchanh in Joe Biden nih a tei timi phu zong lamcung ah an chuak ve i mipi le mipi kar ah buainak, states le states kar ah buainak ai pehzulh vima kho mi dirhmun ah an um kho ti a si.
A ralaimi January 20 chunlai thawk in US ralkap le palik nih President Trump cu President tiah salam an peknak caan a dih cang lai. Cu tikah Mr Trump nih biacaihzung ah a nawr mi a hlawh a tlin lo ahcun White House in a ttuan hrimhrim a hau te ding khi a si.
Source: BBC
