Chin ramkulh chaklei Tonzang peng Luntak khua ah SAC ralhraang nih May 11 ah khan bomb a thlak caah biaknak inn 2 le zapi inn 4 an rawk i khuami 1,000 tluk ral an hrial tiah theih a si.
A tu lio hi Tonzang peng chungah Chin miphun ralkap CNA le SAC leitang ZRA hna karlak ah kahdohnak a chuak cuahmah.Tonzang khuapi luhchuahnak vialte SAC ralhraang nih an phih viar i Tonzang peng Lungtak khua,Phaitu khua le Nakzang khua in khuami hna cu ral an hrial hna.
“Kahdohnak a chuak lai tiah thawng a len nak cu a sau ngai cang i khuami hna cu ral kan i hrial cia caah a tu bantuk in SAC nih bomb a thlak ah hin tualchungmi hliam tuar cu an um hraw lo.khua thum fonh in ral a zam mi hi minung 1000 tluk kan si” tiah khuami pakhat nih Zalen ah a chim.
SAC nih vanlei in kahdohnak a tuah ruangah hin RC biakinn pakhat le ZRB biakinn pakhat telhin khuami inn 4 a rawk tiah theih a si.
