SAC a do tu tlangcung hriamtlai phu hna nih an laak cang mi hmun ram i China-Myanmar ramri gate pawl hna cu pehzul in phihkhar dingah ralhraang bawizik Min Aung Hlaing nih Tuluk cozah sinah nihin ah a nawl.
Min Aung Hlaing cu a voi 8 nak Greater Mekong Subregion Economic Cooperation Program le Cambodia,Lao,Myanmar,Vietnam ttuankhat nak meeiting hna kai dingin Tuluk ram a phanh hi a si i nihin Kunming khuapi ah tuluk hruaitu hna he tonnak an ngeih nak ah a tu bantuk a chim hi a si.
Tuluk le Myanmar hi meng 1300 tluk sau in ramri aa tong mi an si i cu chung ah Muse, Chinshwehaw,Kan Paik Ti, Loije,Mongla tiin a biapi mi ramri gate panga pin ah gate dang tete zong an um i a dam deuh cu KIA,TNLA le MNDAA kut chung ah an phan hna.
Kan hnu August thla canceo ah khan Tuluk ramdang vuanci ( China Foreign Minister ) Wang Yi cu Naypyidaw a rak phan i cu hnu tlawmpal ah Myanmar – China ramri gate hna an khar hi a si.
Dohtlennak phu hna nih an chim ning ah Tuluk cozah nih hin Kokang ralkap MNDAA le Ta’aung ralkap TNLA nih an laak cia nak hmun chung i ramri gate in thil luhchuah ter an duh bak lo.
Cutin Tuluk cozah nih phihkhar nak a tuah mi cu ralhraang bawizik Min Aung Hlaing nih a dirpi i tlangcung hriamtlai phu hna he i chawleh nak cu “ Phungninglo Ramri Thilzuarnak” a si caah pehtlaih nak zong tuah lo dingin Tuluk cozah sinah cun a hal hna.
