2020 kum US thimnak ah teinak a cotu Joe Biden le Kalama Harris hna cu vawleicung minthang TIME magazine nih Person of The Year ah a thim hna.
TIME magazine nih an twitter ah an thanh ning ah cun Mr. Biden le Harris hna nih tukum voikhat te ah teinak an hun hmuh mi hi US tuanbia ah chinchiah awktlak a si tiah an tial.
TIME magazine nih 1927 kum ah an rak thawk mi vawleicung minthang magazine a si. Tukum Person of The Year thimnak ah US president elect Joe Biden le Harris an thim hna nak kong he pehtlai in Time Magazine Editor in Chief Edward Felsenthal nih cun,
“US ram ah US tuanbia an thlen ti mi a lang. Uting nauzo nunhrawn in nun hi thleidanh mi nun nakin a tha deuh tiah an langhter. A tuar mi kan vawleipi damnak ding ca ah hlawknak an a um timi hmuh ning an langhter khawh ca ah an mah pahnih hi Person of The Year ah thim an si nak a si”
tiah a chim.
Tukum Time Magazine Person of The Year thimnak ah a ngah kho ding minung hna an thim mi hna chung ah Biden le Harris hi an rak i tel hmasa lo. Ruah lo piin an hun chuah hi a si. Hi bantukin 2016 kum lio zong ahkhan Trump president a tlin lio ah an rak thim bal ve.
Time Magazine nih Preson of The Year a thim tikah kumkhat thla 12 chung ah a tha lei in siseh, a chia lei in siseh, mi a hip bikbik pawl kha thim an si tawn.
Tukum Time Magazine nih kum khat chung ah thim hlei mi pasal nusal cazin a langhter mi chung ah ngandamnak lei in Frontline Health Care Workers le Dr. Anthony Fauci an thim hna. Chawlehnak lei in mi a hip bik ah Zoom company ngeitu Eric Subrah Yuan thim a si.
Kumkhat chung lentecelh minthang bik ah US Basket ball celhthiam Lebron James thim a si. Zungmawi (Artist) lei ah Korea hlasak thiam phu BTS thim an si.
Time Magazine nih Person of The Year a thim mi hna hi lawmhpi awktlak tiah ruah a si lo. A tha lei le a chia lei in minthang bik le mihip bik kha thim an si tawn. A tha lei minthan ah Pope Francis, Martin Luther King le a chia lei ah Adolf Hitler zong thim a rak si bal.
Source: BBC
