Thla 11 Chung Ah SAC Ralkap 15,000 Deng An Thi Tiah NUG Nih A Thanh
Kum khat chung hrawng ah PDF nih SAC ralkap 14,890 an thah hna, 4,814 hliamhma an pu, tiah NUG Defense Ministry nih cathanh a chuah.
Mizapi nih SAC ralkap dohnak( D-Day) cu 2021 September 9 ah NUG Acting President Duwa Lashi La nih a rak thanh. Atu NUG Defense Ministry cathanh an chuahmi ah 2021 June 1 in 2022 May 17 tiang, thla 11 chung ah SAC ralkap a thimi zat cu NUG nih a langhter.
SAC ralkap nih hrmahram uknak an lak hnu in mizapi nih duhlonak langhter a si caah SAC ralkap nih a phunphun in hremnak, tlaihkhihnak le thahnawnnak an tuah. 2021 April in mah le ngeihmi hriamnam he SAC ralkap cu doh cio a si.
NUG nih 2021 May 5 ah PDF a dirhnak kong a thanh i, hmunkip ah PDF an karh. SAC ralkap thawng petu Dalan pawl zong an doh hna.
PDF a dirka ahcun tlangcung hmun cheu khat lawng ah SAC ralkap doh a si i, atu ahcun Yangon, Mandalay le Naypyitaw khua ngan pawl telh in hmunkip kakip ah SAC ralkap le anmah lei ṭangmi hna cu nifatin in an thi.
PDF nih an hipmi, an ukmi hmunhma hna ahcun mizapi uknak an ser cangnak zong NUG Defense Ministry nih a langhter. Sagaing ramṭhen, Magway ramṭhen, Kachin Chin, Karen le Kaya ram ah kahdohnak a zual tuk caah SAC ralkap thazaang tam tuk an chap. Tualchung mi inn le lo an khanghmi a tam chin lengmang.
A hlan ahcun thal pak, kutser meithal in SAC ralkap rak doh a si i, atu ahcun meithal ṭha deuh in an doh cangnak kong cu NUG nih a langhter.
PDF le SAC ralkap kahdohnak ah PDF lei a thimi le aa hliammi cazin cu NUG nih a langhter lo. PDF nih bomb in puah hnawhnak, hmaitonh in i kahnak, a thli in kahnak hi SAC ralkap dohnak ah an hman bikmi a si. SAC ralkap lei nak in a thimi le aa hliammi a let in an tlawm deuh, tiah theih a si.
