CBN News, 07 Nov 2020: Myanmar ram cozahpi thimnak cu thaizing date 08 Nov 2020 (zarhpini) ah ngeih a si canglai, asinain ramkulh / pengkulh cheukhat ah cun security thil ruangah thimnak ngeih a sirih lailo.
Upper House ah seat 168 le Lower House ah seat 330 caah thimnak hi ngeih a silai i, election result thanh hnu ah Parliament (Hluttaw) inn pahnih hna nih Joint session an ngei tthan lai i cu hnu ah Myanmar rampi President ding thimnak an ngei tthan lai.
Tutan thimnak ngeih dingmi hi kum 2008 i Ralkap cozah nih phunghram an ser tthan hnu ah cozahpi thimnak a voi 3 nak ding a si.
Kum 2010 election ah khan Aung San Suu Kyi le a party NLD cu election ah i cuh velo in boycott a rak si, cu ruangah Ralkap dirpimi party USDP cu General Thein Sein President tthithruainak tangah Cozah an rak ser. Kum 2015 election ngeih tthannak ah NLD nih teinak an hmuh i Civil cozah a dir kho.
Tukum 2020 election zong ah NLD caah ruahchannak nganpi a um, a sinain phunghram nih a pek bangin Parliament inn hnih ah Ralkap member 25% ruat a si, hi ruang ah NLD nih cozah ser kho ding i majority ngei dingin 75% seat a tangmi ah cheu 3 cheu 2 tal an lak khawh a hau.
President sinah nawlngeihnak pek si hmanh selaw Defence le security lei cu Ralkap nawlngeihnak a si. Ralkap nih Union Cabinet Minister pathum an ruat khawh, Ministry biapibik pathum, Defence, Home affairs le Border affairs hna hi ralkap kut ah a ummi an si.
Myanmar phunghrampi hi remh tthan dingin lawmaker 75% nih an cohlan a hau, NLD nih hi kong hi parliament ah voi tampi a chuahpi cang nain Ralkap nih an khanhmi Lawmaker hna nih an cohlan piak duhlo ruangah phunghrampi cu remh khawh a si rih lo.
CBN News
