Thailand ram rilikam Samut Sakhon timi hmun Seafood Market pakhat ah COVID zawtnak chawnhnak thar a chuak i, Kawl riantuan minung 500 hrawng zawtnak an i chawnhbarh tiah theih a si.
Hi Samut Sakhon hmunhma hi Kawl riantuan (migrant workers) pawl an tambik nak hmun a si i, December 17 thawk in zawtnak chawnhnak a chuak i nithum chung ah minung 700 leng rai an i chawnh. Cu chung ah Kawl riantuan minung 516 nih zawtnak an i chawnh tiah Thailand ram ngandamnak zung nih an thanh.
Cu ca ah Samut Sakhon hmun cu Cozah nih Lockdown an chiah colh ti a si. Samut Sakhon hi Kawl riantuan a thongsang in an umnak a si i, chungkhar he khuasa zong tampi an umnak a si.
Samut Sakhon ah COVID rai ai chawnh mi 90% hi Kawl mi an si i, Kawl riantuan pawl he lam naih tete in khua an sak hna ruang ah zawtnak a chuah khunnak a si tiah Thailand ram ngandamnak zung nih an chim.
Zawtrai chawnhnak a karh ruang ah Samut Sakhon hrawng ah a ummi, riantuannak, sianginn hna cu an khar dih i Kawl riantuan hna ca ah pawcawmnak lungrethei a si ko tiah Thailand ram khuasa Kawl mi hna riantuannak lei Foundation in lutlai U Min Min Oo nih a chim.
Source: BBC
