Australia cozah ngandamnak department pakhat a si mi TGA (Therapeutic Goods Administration) nih COVID-19 khamsii pakhat a si mi Pfizer cu Australia ramchung hman ding ah a fehter cang.
Relchap: Vawleipi Nih Ruahchan Cio Mi COVID-19 Khamsii Pfizer Cu Zeidah A si?
Hihi Australia ramchung ah a pakhatnak COVID-19 khamsii hman ding cohlannak zong a si. TGA thanh ning ah cun Pfizer khamsii hi a himbawm mi le a tha mi khamsii a si tiah biakhiahnak chung ah a telh chih.
Pfizer khamsii hi Australia ramchung ah kum 16 in a cunglei ca ah hman khawh ding in zumh a si. Voihnih chunh a si lai i, Ni 21 dan ah chunh a si telai ti a si.
Zeitik Ah Dah Khamsii Chunh Ai Thawk Lai?
Pfizer company nih Australia cozah sin ah thawng an thanh ning ah cun COVID-19 khamsii hi Australia ramchung ah February thla dongh lei ahhin a phan telai ti a si.
Australia ramchung ah COVID khamsii hman ding cohlannak an tuah hi Australia ramchung ah avoikhatnak COVID-19 rai an rak hmuh ni kumkhat a tlin ni bak te ah a si tiah PM Scott Morison nih a chim.
“TGA nih Pfizer khamsii an cohlan mi cu ka conglawmh ngai hna. Kan ram mi thiamsang hna nih a tha tiah an cohlan” tiah a chim.
Asutralia ramchung ah February thladongh hrawng ahcun zarkhat ah COVID-19 khamsii dur 80,000 cu chunh hram an thawk telai. Marh thla dih hrawng ahkhan AstraZeneca khamsii cu zarh khat ah million pakhat hrawng an chunh khawh telai tiah zumh a si.
Australia ramchung ah a tutiang COVID-19 rai in mizaw 28,766 an phan cang i, minung 25,486 an dam cang. Minung 909 an thi cang i, January 24 ahkhan zawtnak thar hmuh mi minung 5 an si tiah theih a si.
Nihin vawleicung ah COVID-19 in mizaw 99.2 million an phan cang. Minung 2.13 million an thi cang.
Source: 9News
