Chin ramkulh chaklei Tedim le Tonzang peng chung ah kum dang nak in tukum 2024 kum ah hin Bing a cing mi an tam deuh tiah theih a si.
“A hlan ah khan cun cozah nih an hmuh khawh lo nak,khua he aa hlat nak ti bantuk lawng ah rak cin a si.a tu cu khuapi chung i phaisa ngei pawl zong hlawhfa an chor i an cin thluahmah ko.a tlawm bik ah Acres pahnih tluk cu an cin cio hna. Van that ah cun Acres pahnih ah hin Bing hring cuai hnih tluk an laak khawh. Van chiat bel ah cun khaini bawm bawmthum tluk hna lawng an laak ve. Bing cing dingin hlawhfa an chor mi hna hi eidin an rin hna pin ah kyats 10,000 in 15,000 karlak an hmu hna.a tu hi cu a ci phawi i vun cin caan te a si.” tiah khuami pakhat nih Chin World ah a chim.
Kan hnu kum bing zaat caan ah khan cun bing hring cuai khat hi Myanmar phaisa in ting 80 le ting 100 karlak in rak zuar a si i tu kum cu cuaikhat ah ting 100 in 160 kar hi cu hmuh dingin ruah chan a si.
SAC ralhraang nih hramhram in uknak a laak hnu ah hin chungkhar pawcawm nak caah tiin hawi bang ramdang a kal kho ve lo mi ramchung mino tampi zong bingcin ah aa hlawhfa mi an karh ngai ngai tiah theih a si.
“ Bing cin nak i aa hlawhfa mi a tam u hi cu Tedim le Tonzang peng chung mi deuh an si ko hna. Kalay,Khampat le a pawng kam khuate zong in a rak i hlawh mi an um len ve.” Tiah binglo a tuah mi pakhat nih cun a chim ve.
Nihin ni tiang ah cun Tedim le Tonzang peng chung i bing cin nak kong he pehtlai in Chin hriamtlai phu lei in siseh SAC ralhraang lei in siseh zeibantuk dantat nak hmanh an tuah rih lo tiah theih a si.
