Kum hnih chung fak ngai in i kahnak a um hnu ah Cozah ralkap Tatmadaw le AA hriamtlai hna cu UWSA hmun ah tonnak an ngei kho tiah theih a si.
Tatmadaw le AA Tatdaw hna cu nizaan tih ni December 9 ahkhan Wa hmunhma pakhat ah hmaitonh biaruahnak an ngei.
Tatmadaw le AA ralkap lutlai hna tonnak hi Wa hmun ah an tuah i, Wa hriamtlai hna nih kaphnih himnak le khuallam vialte ttuanvo a lak piak hna tiah theih asi.
Wa hriamtlai UWSA lei in chimrelnak nawlngeitu Kyauk Kaw Ang nih, Nizaan December 10 ahkhan Tatmadaw lei in upa hna cu an kir cang tiah a chim. Tatmadaw lei in Boyoke rank pawl an i tel kho i, AA lei in Deputy rank an i tel timi zong thawngpang a leng.
AA lei in Deputy-Chief of Staff a si mi Dr. Htun Nyo Aung zong AA lei hruaitu ah a rak i tel kho tiah thawngpang a leng.
A luancia November 25 zong ahkhan AA le Tatmadaw hna cu Online in biaruahnak an rak ngei kho.
AA Le Tatmadaw Online In Biaruahnak Kan Ngei Tiah AA Nih An Thanh
AA le Tatmadaw hi 2018 kum in 2020 tiang biatak tein an i kah ruang ah mipi a nuai in ralzaam an cang. A luancia November thla tiang zong fak ngai in an i kap thiamthiam rih.
Kan hnu November thla dongh hrawng ahkhan Japan ram in rampi remdaihnak lei ah Japan cozah ai-awh tu upa Mr Sasakawa nih kaphnih remdaihnak tuah ding in an karlak ah lamkalnak a rak tuah tiah theih a si.
AA le Tatmadaw cu Online in siseh, hmaitonh in siseh an i tong ko nain cozah nih AA cu terrorist cazin in a hnawt rih lo.
Source: BBC
