Chin ram chaklei Taingen lei panh mi a rak kai mi SAC ralkap minung 60 tluk cu nihin January 20 ah Kalaymyo lei ah an rak tum than cang tiah khuami hna nih an chim.
Chin hriamtlai phukomh hna nih Taingen sakhaan an laak caah Kalaymyo in a kai mi SAC ralkap hna cu Tedim peng Hingzing khua tang Natan hrawng an phak zawn in Kalay lei ah an kir than hi a si.
“January 17 ah khan Natan tiang an phan,cuka cun an i din i hmun an khuar.kai nawlh ti lo in nihin ah kalay lei an tum than hi a si.lam hmuhsak tu ding ah an kai pi mi minung 3 an kai mi hna.chun hrawng ah khan Kalay an phan than cang” tiah khuami pakhat nih a chim.
Lam hmuhsak tu ding ah an i kaipi mi minung 3 zong an thlah than hna tiah theih a si.Taingen sakhaan laak lio ah hin SAC ralkap minung 2 an zaam kho i nizan January 19 ah Khaikam an phan tiah theih a si.
Cu ralkap pahnih hna nih cun khuami hna cu meithal hmuah in an tlerkhawnh hna hnu ah an cycle hram hram in an chuh hna i khaikam lei ah an rak zam hi a si tiah theih a si.
“SAC ralkap pakhat nih khuami pakhat cu meithal in a hmuah a rak zam.Htezan khua an phak ah khuami nih a meithal cu an chuh khawh ko nain cycle tu cu ai zam pi.cu bantuk thiam in a dang pakhat zong cu Htezan khua ah bomb ai ken i cycle a hal hna hnu ah cu cycle cun Khaikam lei ah a zam ve hi a si” tiah khuami hna nih Zalen ah an chim.
Cu tin Khaikam khua a phan mi SAC ralkap minung 2 hna cu January 19 ah khan Kalaymyo khuachung lei in ralkap motor pahnih in an rak laak hna.
Taingen SAC sakhaan cu January 16 ah khan Chin hriamtlai phu komh hna nih an rak laak i hriam le meithal tampi an rak laak.
