Nizan naite Siaha ah lainawnnak a chuak mi kongkau he pehtlai in sualpur ve lo ralzam hna cung ah huatnak le zohchihnak a um lo nak ding ah fimkan a herh kong LIKBK nih cun nihin January 30 ah cathanh an chuah.
Lairam Isua Krista Baptist Kohhran Assembly nih cun ralzaam hna zohkhenh kongkau ah nihin tiang hma a lak peng ko. Unau thisen tlai kan si i ramkip ah um hmanh usilaw , ramri nih an kan then kho taktak lo. Khrihfabu nih nihin tiang an harsatnak hngal in kan ti khawhtawk in dawt le zawnruahnak he kan zohkhenh hna.
Nizaan tihni ah i lainawnnak a phanh caah thildik lo zeimaw tete a phanh khawh caah sualpur ve lo ralzaam puhnak le huatnak fak pi’n a um tiah kan theih. Hi kongkau ah hin Khrihfabu hna i fimkaan kan hau ngaingai.
Biadik hngal hmasa lo in , sualpur ve lo ral phunphai, midang huatnak le zohchihnak thinlung an ngeihnakhnga lei hoih in biachuah a um țheo. Cu bantuk thil ah cun i fimkaan a herh ngaingai. Ralzaam kan unau hna hi a herh ning in an thlakaam kan huhphenh hna a herh. ” Kan u le nau, zumtu hawi hna’ ti’n kan sinah an hung lut’ tiah LIKBK Assembly nih cathanh an chuah.
” Cu bantuk cun zeimaw harsatnak ( issue ) a phanh caan hin kan Khrihfabu hmalaknak (Refugee Ministry ) dolhkalh in biachim holhrel a tam ngai. Cucaah Khrihfabu hna zong nih fianh a biapi ngai. LIKBK Chin Refugee Ministry nih misual humhim ding hna, an that lo nak thlahzamh, thlahthlam dingin kan zohkhenh hna lo.
An Thlarau nun lamțha ah hruai le , Mizoram zapi cungah harnak chuahpi tu si lo ding le Thluachuah phurtu si dingin timhtuah piak an si hi kan theih a biapi ngai. Miza cawh an si caah an lak ah chimh khawng deuh le zukhmawng tuah zong an um kho ko.
Chimh khawng hna phungbuar mi hna cu phung in hrem le an thiltuahmi an ngol khawhnakhnga nawlngeitu kan țuanpi hi a herh zungzal ko. Pathian nih Israel miphun sinah ‘ Cucaahcun ramdang mi cu daw hna u , nan nih zong Aigupta ram ah khan ramdang mi nan si kha” a ti kha hngalpeng ko uh” tiah LIKBK Assembly nih Khrihfabu le zapi sinah theihternak an tuah.
