Kawl ramkomh cozah ralkap Tatmadaw nih kengruangruh ah ai hman mi Myanmar Economics Holding Limited Company (ဦးပုိင္) cu a hawikomh a si mi Singapore ram RMHS Company nh taza ka cuai lai tiah aa timh cuahmah lio a si tiah theih a si.
Nihin zing December 24 ahkhan RMHS company nih thanhnak a tuah. Hi company pahnih hna hi 1993 kum thawk khan Virginia Tobacco Company Limited (VTLC) timi an rak dirh tti i, cu company tang cun kuakrang (cigarettes) an chuah.
Hi VTCL company nih hin Kawlram komh chung ah a min a thang bik mi kuak Red Ruby le Premium Gold an chuah. An riantuannak ahhin MEHL (ဦးပုိင္ကုမဏီ) nih shares 51% ai lak i, Singapore company RMHS nih 49% ai lak ve.
Singapore company a si mi RMHS nih taza a cuainak a ruang hi MEHL (ဦးပုိင္ကုမဏီ) nih 2016 kum chung ah rak fehter mi kuak le khuhsi chuahnak phung ningin MEHL (ဦးပုိင္ကုမဏီ) lei nih zulhphung an buar ruang ah siseh, UNO lei in MEHL (ဦးပုိင္ကုမဏီ) sin ah an rak hal mi an tuah lo ruang ah tazacuai a timh hi a si tiah RMHS lei nih an langhter.
MEHL (ဦးပုိင္ကုမဏီ) lei nih hin Company nih an miakmai mi data langhternak le chekhlatnak zong ah a zalong mi bu ser ding zong MEHL (ဦးပုိင္ကုမဏီ) lei in an hnonpiak hna timi zong thawngpang a chuak.
Cu pin ah COVID caan chung ah MEHL (ဦးပုိင္ကုမဏီ) lei in VTCL cung ah rian an tuanning le riantuantu pawl cung ah covo an serpiak duh hna lo mi kong zong ah Singapore company lei an lung a tling lo i, tazacuai an timh hna nak hi a si tiah theih a si.
A tulio ah Kawlram komh chung ah ralkap nih an ngeih mi MEHL (ဦးပုိင္ကုမဏီ) he ai pehtlai mi le an tuah mi chawlehnak pawl cu fak ngaingai in vawleicung nuhrin covo phu hna nih fak ngai in mawhchiatnak le phihkharnak an tuah i, South Korea Company minthang POSCO le LOTTE zong an i tel ve tiah theih a si.
Source: Irrawady
