Chungkhar harsat ruang ah Phungki nih sualpi a sawm mi nu nih a rak eet ca ah a sual pi hnu ah phungki pa hi a report mi a si tiah theih a si.
Myanmar ramkomh ah cozah nih a tuah mi Lottery (Awngbali) sing thong 15 a rak cotu phungki pa cu nu tlaihhrem ruang ah an tlaih cang tiah theih a si. Hi thil hi Naypyidaw Aye Mettasan phungki sianginn ah phungki sianginn luzik U Sandima a si i, cu phungki sianginn ah cachim a tuan mi nu cu a tlaihhrem tiah theih asi.
Aye Mettasan phungki sianginn ah Japan holh a chim mi siangcachim nu hi kum 33 a si i, innchung he khua a sa mi a si i, sualphawt phung 127/2020 Pohmah 376 in taza a cuai hi a si.
Hi chungkhar hi an harsa ngai i a tlaihrem tu phungki pa nih a bawmh hna hnu ah Yangon in Naypyidaw ah ai thial mi an si. Kumkhat chung ah phungki pa nih hin voi li tiang a ka sual pi tiah nu nih cun a chim.
Nu nih cun, “a duhnak ka tlinhpiak lo tikah phungki sianginn ah ra ti hlah, tuition ka chimhnak zong a mah hi chimhter hlah u tiah a ti hna. A kenkip in rialditnak a ka tuah i, kumkhat chung ah voili tiang a ka sualpi mi hi a si khawh tilo mi thil ah a cang mi a s” tiah a chim.
Hi phungki pa hi a phungki puan phoihter in mi ah canter hnu ah tazacuai le thongthlak ding in timh lamh a si i, phungki phu hna sin ah a phungki puan phoihnak ding ah an tawlrel cuahmah lio a si tiah theih a si.
Source: Myanmar Now
