US ram president thar Joe Biden a thaisung Dr. Jill Biden kong hi Laica in tial mi a um rih lo tluk a si. Cu ca ah CBN nih DVB Presenter Ne T. Nyein nih “Siangcachim sinak ai duh ngai mi President nupi” tiah a tial mi cu Laica in ai tlak ning in kan rak leh.
Dr. Jill Biden hi President Joe Biden nakin kum 10 hrawng a hngakchia deuh ti a si. An no lio tein ai duh i, ai thi-um mi an si lo nain, lung ai khat mi an si ruang ah ai thi-um mi an si tiah an chim theo.
Dr. Jill Biden hi New Jersey ramkulh Hammonton kek a si i, unau nu lawngte panga lak ah upa bik a si. A pa Donald hi phaisa cawihnak rian ah a tuan mi a si tiah theih a si. A mah hi 1967 kum ahkhan high school a lim i, Junior College a kai.
1970 kum February thla ahkhan a voikhatnak chungkhar a rak dirh. A va hi Bill Stevenson a si i, a hnu ah an i then. Hi an i then hrawng hi Joe Biden caanchiat sunghzatlak a ton lio le a ngaihchiat lio caan a rak si an ti.
1972 kum ahkhan Senate thimnak ah a rak tling. Vanchiat ah mawtaw khendennak ruang ah a thaisung Neilia Hunter Biden le a fanu kumkhat rual an rak thi. A fapa pahnih hna cu thihnak van nih a rak kheng hna lo i, an rak luat.
1975 kum ahkhan Joe Biden a far nu nih a rak theihter hna hnu i, College sianghngakchia nu Jill le Senator Joe Biden an samhri a rak i tong. Avoikhatnak ah Baisikup zung ah an rak i tong hmasa i, a voikhat tonnak bak ah an i rak i uar colh tiah Vague Magazine nih a tial.
Asinain, a takakt i thitumh ding ahhin Joe Biden nih voi nga khengte a rak hal ti a si. Joe Biden a fapa le pahnih nih an nu ei si ding ah an duh taktak hnu lawng ah kan i thi um lai tiah Jill nih a rak i tim. “Joe fale hna hi an nu nih a thih tak hna. Cu ca ah nu ei pakhat hnu chan ding ahhin sunghzatlak an tong than sual lai timi ka rak ruat kho lo. 100% kai fian hnu lawng ah biakhiah ding in ka rak i tim” tiah Jill nih a chim.
1977 kum June thla 17 ah an rak i lehthah. 1981 kum ahkhan Joe le Jill cu fanu pakhat an hun ngei. A min ah Ashley Biden tiah an sak. Joe a fapa le pahnih he cun fa pathum an hun ngei. Joe Biden hi Senator rian a tuan ahhin tlanglawng in a rak kal ti a si. A ruang cu a chungkhar he caan hman deuh a duh ruang ah a si ti a si. A tu ah cu Joe le Jile cu tufa 5 an hmuh cang hna.
Dr. Jill Biden hi hmuhton a ngei i, cathiam ngai a si. A tu US ram White House zong khi thar hlam ngai in a lut mi a si lo. Vice-president nupi a rak si lio tekhan President nupi sinak ding ca ah tiah timh cia ngai a rak si cang ti a si.
Asinian, Dr. Jill Biden hi a vapa sunparnak tang ah ai nuam sawhsawh ding phun dawh cu a si lo. Second Lady a rak si lio hrim khan US ram ralkap pawl le an chungkhar pawl bawmhnak ca ah biatak ngai in a rak cawl mi a si. An fapa Beau Biden kha US ralkap a rak si ca ah US ram ah ralkap hna i an chungkhar le an sining khi pumpak in a theithiam kho mi nu a si.
Cu ca ah 2011 kum thawk khan First Lady Michell Obama he ralkap pawl le an nupi le pawl bawmhnak, rian an hmuh khawhnak tibantuk ca ah an rak cawl cang ti a si. 2013 kum zong ahkhan Ralkap pawl an fale ca ah cauk pakhat a rak chuah. An fapa Beau Biden cu Iraq ram ah a nunnak a rak liam i, Beau Biden a fanu Natalie ca ah lungfah le ngaktah thinlung kha cauk pakhat in a rak tial cang.
Dr. Jill Biden hi a vapa Joe Biden Vice-president a tuan hlan 1993 khan Cancer zawt dohnak ca ah an rak tuan ngaingai cang. Delaware ramkulh ah Hnuk Cancer Zawt Dohnak Foundation pakhat zong an rak dirh. Nu no tete hna Cancer zawtnak in an himnak ca ah tiah cawnpiaknak zong an ngei tawn. 2013 kum akhan an fapa cu thluak cancer in a thi. Cu hnu lebang ahcun biatak tein cancer zawtrai dohnak ca ah biatak ngai in an i tim lam.
US White House zong ah President Obama kha Cancer rai dohnak ca ah a lung a um khawhnak hnga an rak sawm khawh. White House in an chuah hnu zong ah Cancer hlathlainak le thlopbulnak kong ah an nupa in rian an rak tuan peng ti a si.
Siangcachim Dr. Jill Biden
Dr. Jill Biden hi a cunglei ah langhter mi rian tampi a tuan ko nain, a duh taktak mi rian cu siangcachim rian hi a si ti a si. A nunchung caan tam deuh paoh cu fimcawnnak ah a phum deuh tikhawh a si.
Delaware University ah Degree a ngah hnu 1973 kum akhan Private siizung, thinlung lei damlo mi hna siizung pawl ah mirang ca a chim. Innchungkhar rian hnok le hnai he Master zong a lim khawh. 1981 kum ahkhan West Chester State College le 1987 kum ahkhan Pensylvania University ah Master degree pahnih a lak.
Delaware cozah sianginn ah mirang cachim rian a tuan. A hnu ah Delaware le Community College pawl zong ah mirang ca thiamthiam a chim. Mirang cachim rian in kum 15 a tuan. 2006 ahkhan Delaware University ah fimcawnnak lei in Ph.D a rak ngah.
Dr. Jill Biden hi fimcawnnak lei ah hmuitinh sang taktak a ngei mi a si. Ai sehchih ngaingai. A vapa Vice-president a tuan lio zong ah Nort Virginia Community College ah full time in ca a chim thiamthiam.
Los Angles Times hoi nih cun, US ram tuanbia ah Vice President nupi hna lakah Vice President nupi sinak in full time riantuan mi nu a si tiah a rak tial phah.
A tu cu US First Lady a hung si cang. Asinain, Dr. Jill Biden hi a duh tuk mi siangcachim rian kha ka kaltak lai lo tiah a chim. CBS Sunday Morning he interview ah, “White House ka phak zong ah siangcachim rian cu ka hlaw lailo. Siangcachim rian hi a biapi tuk. Ca chimh hi man ngeihter a herh. A biapi tuk ti mi kha mipi nih fiang hna seh ti ka ti” tiah a chim.
US President nupi First Lady hna an tuanbia zoh tikah zeitluk in an fimthiam zong ah, White House an phak ahcun an rak nun tawn ning kha an hlawt ta i, President pahrang ah i kawp in a nunning ai lungsak an tam.
Asinain, President Joe Biden thaisung Dr Jill cu President nupi si hnu zong ah a duh ngai mi rian Sianginn cachim rian kha ka kaltak hrim lailo tiah a chim ti a si.
Source: Ne Tun Nyein
