Chin ramkulh,Thantlang, Bualpeng Salen khua um ralzam inn cheukhat cu April 16 zinglei slm 3 tluk ah duah piak an tong tiah thawng kan theih.
“An duah hi zinglei slm 3 tluk ah a si,meikangh thawng an theih caah an i thang i mei an phalh manh. Mei hi phalh manh lo siseh law minung an i hngilh saling pi a si caah nunnak liam zong an um kho, tihthing cheukhat le inn tung hna cu an kaang manh cang,inn khat hna cu an facang chiahnak zong an khangh piak hna i a tlaih manh hlan ah an phalh manh” tiah khuami pakhat nih CBN Daily News ah a chim.
Inn duah piak a tong mi hna cu Saya Bawi Tha Bik, Pu Tha Bik, Pu Tial Ceu Uk, Pu Hrang Lian Thang inn hna an si i a ho ti theih lo mi nih inn tang in an duah hi a si.
“A duah tu hi a ho set a si kan thei kho rih lo nain hmakhat te ah an duah mi hi inn 4 a si caah mei duahtu phu ah hin a tlawmbik minung 4 cu an i tel hrim lai tiin kan zumh” tiah a chim chap.
A luancia caan zong ah ralzam inn hna cu lungcheh piak an tong tawn tiah theih a si i mizei an si an theih hlei lo.Salen khua ah hin nikum ah bu thennak a rak chuak i cu hnu cun inn lam fanh,le hmuh thiam lo nak te te a rak um pah len cang.
Hi kong he pehtlai in hmunhma ah rian ngeitu hriamtlai phu le biaknak lei upa zong nih an tlaangtlak hna nain nihin ni tiang rem nak ser khawh a si rih lo tiah thawng kan theih.
A tutan inn duahpiak kong ah minung hliam tuar cu an um lo nain Ralzam hna cu zaan zong ah mitku thaw tein an it ngam ti lo tiah kan theih.
